भ्याली पब्लिक र ग्रिनल्याण्ड उपाधि नजिक

काठमाडौं । भ्याली पब्लिक कप १३औं अन्तर विद्यालय बास्केटबल प्रतियोगिताको सिनियर छात्रमा आयोजक भ्याली पब्लिक ए र सिनियर छात्रामा ग्रिनल्याण्ड उपाधि नजिक पुगेका छन् ।

बिहिवार भएको सेमिफाईनल खेलमा भ्यालीपब्लिक ए ले ग्रीनल्याडलाई ४७–३१ को स्कोरमा हराउदा राहुल बिकले सर्वाधिक १८ स्कोर जोडे । सिनियर छात्रकै अर्को सेमिफाईनलमा ड्याफोडिलले आयोजक भ्यालीको बी टिमलाई ३८–१६ को स्कोरमा हराउदै उपाधि नजिक पुगेको हो । ड्याफोडिलको जितमा आङपुर्वा शेर्पाले सर्वाधिक १७ स्कोर गरेका थिए ।

गल्फुटार स्थित आयोजकको कोर्टमा भएको सिनियर छात्राको सेमिफाईनल खेलमा सफलता हात पादै ग्रीनल्याण्ड र एचएचसीएले फाईनलमा भेट पक्का गरेका छन् । ग्रीनल्याण्डले भद्रकालीलाई ३०–१५ ले हराउदा प्रमिला जगारीले सर्वाधिक १३ गरिन् ।

अनिता सुनुवारको सर्वाधिक १९ स्कोरको मद्दतले एचएचसीएले टिआईएलाई ३०–११ को फराकिलो अन्तरले हरायो । फाईनल खेल शुक्रवार हुने छ ।