च्याम्पियन बन्दै शुक्र बने नेपालको नम्बर एक खेलाडी

काठमाडौं । धरानका प्रोफेसनल गल्फर शुक्र बहादुर राईले सुर्य नेपाल गल्फ टुर २०२१-२२ अन्तर्गत सिजनको अन्तिम प्रतियोगिता सुर्य नेपाल प्रिमियर गल्फको उपाधि जितेका छन् ।

गोकर्ण गल्फ क्लबमा बिहीबार ३ अन्डर ६९ को स्कोरसहित समग्रमा १९ अन्डर २ सय ६९ को स्कोर निकाल्दै शुक्रले उपाधि जितेका हुन् । उपाधि जित्ने क्रममा शुक्रले धरानकै निरज तामाङलाई ६ स्ट्रोकले पछि पारे ।

शुक्रको यो करियरको सातौ उपाधि हो । उपाधिसँगै दुई लाख पचास हजार पाएका शुक्र पहिलो पटक नेपाल नम्बर एक गल्फर बनेका छन् । उनले यो सिजनको कुल आठ मध्ये पाँच प्रतियोगिता मात्र खेलेपनि सर्वाधिक ६ लाख ६३ हजार ५०० नगद पुरस्कार सहित नम्बर एक बनेका हुन्।

निरज २ ओभर ७४ सहित समग्रमा १३ अन्डर २ सय ७५ सहित दोस्रो भए। समग्रमा १२ अन्डर २ सय ७६ सहित तेस्रो भएका भुवनले नम्बर एक गल्फरको स्थान गुमाए । उनले अन्तिम दिन २ अन्डर ७० स्कोर जोडे । यो सिजन कुल ५ लाख ८० हजार ५ सय नगद पुरस्कार सहित दोस्रो स्थानमा तल झरे ।  

एमेच्योर वाङ्गचेन ढोन्डुपले १ ओभर ७३ सहित समग्रमा ११ अन्डर २ सय ७७ सहित एमेच्योरतर्फ उपाधि जिते । समग्रमा भने उनी चौथो भए । अर्का एमेच्योर महेन्द्र फगामी समग्रमा १० अन्डर २ सय ७८ सहित एमेच्योरतर्फ दोस्रो भए । उनले अन्तिम दिन ३-अन्डर ६९ को स्कोर गरे । समग्रमा भने उनी पाँचौ भए ।

एमेच्योरतर्फ एकक्षत्र राज गरिरहेको सुबाश तामाङले समग्रमा ७ अन्डर २ सय ८१ सहित पुर्ण बहादुर शर्मासँग संयुक्त रुपमा छैठौं स्थान बाँडे । सुबाशले ५अन्डर ६७ र पुर्णले इभन-पार ७२ मा खेल सकाए । इभन-पार ७२ सहित समग्रमा ५ अन्डर २ सय ८३ सहित एमेच्योर आरव डी शाहले आठौ स्थानमा प्रतियोगिता सकाए ।

भुवन कुमार रोक्का र रबि खड्काले समग्रमा ३ अन्डर २ सय ८५ सहित संयुक्तरुपमा नवौ स्थान बाडे । अन्तिम दिन भुवनले २ ओभर ७४ र रबिले १ ओभर ७३ मा खेल सकाए। एमेच्योर सद्भाव आचार्य समग्रमा २ अन्डर २ सय ८६ सहित एघारौं र समग्रमा इभन-पार २ सय ८८ सहित सुर्य प्रसाद शर्मा १२ औ स्थानमा रहे।

सुर्य नेपाल टुरमा लामो समय सहयोग गर्ने रामजी राजबाहक तथा रमेश नगरकोटी र समिर तामाङलाई कदर पत्र सहित सम्मान गरिएको थियो ।

चार दिने प्रतियोगितामा ४३ प्रोफेसनल र ११ एमेच्योर सहित ५४ खेलाडीको सहभागिता रहेको थियो।

विजयी खेलाडीहरुलाई सुर्य नेपाल प्रालिका मार्केटिङ उपाध्यक्ष दीपरा लहेरी, नेपाल प्रोफेसनल गल्फर्स संघका अध्यक्ष रबिन्द्र मान श्रेष्ठ र नेपाल गल्फ संघका अध्यक्ष टासी घलेले पुरस्कार वितरण गरे।