सुभाषको अग्रता कायमै

पोखरा ।  सुर्य नेपाल गल्फ टुर अन्तर्गत सिजनको पाँचौं इभेन्ट सुर्य नेपाल वेस्टर्न ओपनको दोस्रो दिन एमेच्योर गल्फर सुभाष तामाङले अग्रता कायम राखेका छन् ‌।

हिमालयन गल्फ कोर्स  पोखरामा पहिलो दिन २ अन्डर ६६ स्कोर जोडेका सुभाषले दोस्रो दिन १ ओभर ६९ स्कोरसाथ समग्रमा १ अन्डर १ सय ३५ स्कोर बनाए । उनले दोस्रो स्थानमा रहेका जयराम श्रेष्ठलाई १ स्ट्रोकले पछि पारेका छन् । जयरामले लगातार दोस्रो दिन इभन पार ६८ स्कोर बनाए ।

तेस्रो स्थानका धनबहादुर थापाले दोस्रो दिन १ ओभर ६९ स्कोर जोड्दै समग्रमा ४ ओभर १ सय ४० स्कोर जोडे । संजय लामा (६८) र निरज तामाङ (७०) समान ५ ओभर १ सय ४१ स्कोरसाथ संयुक्त चौथो स्थानमा छन् । भुवन नगरकोटी (७०) र स्थानिय एमेच्योर अजित विक ६ ओभर १ सय ४२ स्कोरका साथ संयुक्त छैटौं स्थानमा छन् ।

सुभाषले फ्रन्ट नाइनमा २ ओभर ३५ तथा ब्याक नाइनमा १ अन्डर ३४ स्कोर जोडे । उनले सुरुवाती दुइ होलमा बर्डी लेखाएपनि तेस्रो होलमा डबल बोगी खेपे । नवौं होलमा डबल बोगी खेपेका उनले दशौं, १३ औं र १७ औं होलमा बर्डी लेखाए । उनले १२ औं र १८ औं होलमा बोगी खेपेका थिए ।

प्रोफेसनल गल्फर्स संघ नेपालको आयोजना र सुर्य नेपाल प्रालिको प्रायोजनमा जारी प्रतियोगितामा ३० व्यावसायिक र १५ एमेच्योर खेलाडीको सहभागिता रहेको छ ।   

प्रतियोगिताको विजेताले १ लाख ३५ हजार नगद पुरस्कार पाउनेछन् । यस्तै उपविजेताले ८८ हजार तथा तेस्रोले ६५ हजार पाउनेछन् ।

त्यसबाहेक शीर्ष २१ मा रहने खेलाडीहरुले पनि नगद पुरस्कार पाउने बताईएको छ ।