गण्डकीका जिल्ला खेलकुदका अध्यक्षलाई स्पष्टिकरण पत्र

काठमाडौं । गण्डकी प्रदेश सरकारले प्रदेश अन्तर्गतका जिल्ला खेलकुद विकास समितिका अध्यक्षलाई स्पष्टिकरण सोधेको छ ।

युवा तथा खेलकुद मन्त्री राजीव गुरुङले प्रदेश अन्तर्गतका जिल्ला खेलकुदका अध्यक्षलाई स्पष्टिकरण सोधेका हुन् । 

प्रदेश खेलकुद विकास नियमावली अनुसार काम, कर्तव्य र जिम्मेवारी पुरा गरेको नदेखिएको बताउँदै सरकारले जिल्ला खेलकुद विकास समितिका अध्यक्षलाई स्पष्टिकरण सोधेको हो । 

सरकारले १५ दिनभित्र चित्त बुझ्दो स्पष्टिकरण पेश गर्न निर्देशन दिएको छ । स्पष्टिकरण चित्त बुझ्दो नभएमा प्रचलित कानुन अनुसार हुने ब्यहोरा समेत पत्रमा उल्लेख गरिएको छ । 

तत्कालिन एमाले नेतृत्वको प्रदेश सरकारले प्रदेशका ११ जिल्ला खेलकुद विकास समितिको नेतृत्वमा आफ्नो दल निकट नेतालाई नियुक्ति दिएको थियो । 

सरकार परिवर्तनसँगै प्रदेश अन्तर्गतका जिल्ला खेलकुद समितिको नेतृत्व परिवर्तन गर्ने क्रम सुरु भएको छ ।

गण्डकीमा अहिले कांग्रेस नेतृत्वको सरकार छ । मन्त्रालय स्रोतका अनुसार एमाले निकट जिल्ला अध्यक्षलाई कारबाही गरेर गठबन्धन आबद्ध दलका नेतालाई नियुक्ति दिने तयारी छ । 

यसअघि कांग्रेस, माओवादी, एकिकृत समाजवादी गठबन्धनको सरकारले बागमती, लुम्बिनी सहितका प्रदेशको जिल्ला नेतृत्वमा समेत हेरफेर गरेको थियो । 

एमाले निकट एक खेलकुद नेताका अनुसार प्रदेश सरकारले खेलकुदमा कुनै काम गर्न नसकेपछि जिल्ला अध्यक्षलाई स्पष्टिकरण सोधेर आफ्नो कमजोरी लुकाउन प्रयास गरेको आरोप लगाएका छन् ।