आहा राराका दुई ठूला विशेषता

काठमाडौं । हुने नहुने दुविधाबीच अन्तत: आहा रारा गोल्डकप सुरु भएको छ । उद्घाटन खेलमा एपीएफले आयोजक सहारालाई हराइसकेको छ । अब शुक्रबारको खेलमा पुलिसले हिमालयन शेर्पाको सामना गर्नेछ । कोरोना भाइरस संक्रमणको अर्को लहरले पूरा देश छोपिएको बेला प्रतियोगिता हुने नहुनेमै डर थियो । अब त्यो रहेन् । जति बेला मैदानमा फुटबल सुरु हुन्छ, सबैले ध्यान खिच्ने भनेको खेल नै हो, अरूले होइन् । त्यो अर्थमा अबको साता दिन भन्दा बढी समय पोखरामा चर्चा फुटबलकै रहनेछ ।

यसपल्टको प्रतियोगितासँगै आहा रारा गोल्डकपको दुई दशक भन्दा बढीको समय पूरा गरेको छ । यो प्रतियोगिताको सबैभन्दा ठूलो विशेषता भन्नु नै, यसको नियमित आयोजना हो । यसपल्ट पनि प्रतियोगता भएको छ, यो आफैमा ठूलो छ । मोफसलमा जति पनि गोल्डकपमा नाममा हुने प्रतियोगिता छन्, ती कुनै पनि नियमित छैनन् । मोफसलमा मात्र होइन्, काठमाडौंमै पनि कहाँ कुनै प्रतियोगिता नियमित भएको छ र ? काठमाडौंमा नकआउट प्रतियोगिता नभएकै लामो समय भइसकेको छ ।

त्यसमाथि अखिल नेपाल फुटबल संघ (एन्फा) ले आयोजना गर्ने सहिद स्मारक लिग ‘ए’ डिभिजन नै पनि त नियमित छैन् । अहिले भइरहेको ‘ए’ डिभिजन लिग पनि एक वर्षको अन्तरमा आयोजना भएको हो, वर्ष ०७६ मा त लिग नै भएन् । प्रतियोगिता नहुनुका कारण अनेक बहाना हुन सक्छन्, अनेक कारण देखाउन सकिन्छ । तर सहाराले आहा रारा गोल्डकप आयोजना नगर्न कुनै बहाना खोजेन्, कुनै कारणलाई निर्णायक हुन दिएन्, भलै बहाना र कारण बनाउने हो भने धेरै थिए ।

आहा रारा गोल्डकपको यो एउटा प्रमुख विशेषता हो । यो आलेखमा हामीले प्रतियोगिताका दुई ठूला विशेषताबारे चर्चा गर्न लागेका छौं, कुनै वर्ष पनि टुट्न नदिएर प्रतियोगिता आयोजना आयोजना गर्न वास्तवकै कम्ती बहादुरपूर्ण काम हो र ? अब अर्को ठूलो विशेषता, यसपल्ट वर्ष ०७७ को संस्करण समग्रमा २१ औं हो, वर्ष ०५८ को क्याराभान गोल्डकपसमेत जोडेर । यसबीच हामीले जम्मा जम्मी छ विजेता मात्र पाएका छौं र त्यसमा पनि प्रतियोगितामा खालि तीन टिमको मात्र प्रभुत्व छ ।

यी तीन टिम हुन्, पुलिस, मनाङ मर्स्याङ्दी र थ्री स्टार । पुलिस र मनाङले त कीर्तिमान छ छ पल्ट पोखरामा उपाधि चुमेको छ । थ्री स्टारको नाममा भने पाँच पल्ट च्याम्पियन भएको इतिहास छ । त्यस बाहेक अफ्रिकी युनाइटेड, सहारा र संकटाको नाममा एक एक पल्ट उपाधि हात पारेको इतिहास छ । संकटाले त पोहोर मात्रै उपाधि उचालेको थियो । त्यस अगाडि वर्ष ०७४ मा पुलिस, वर्ष ०७५ मा थ्री स्टार र वर्ष ०७६ मा मनाङ विजेता रह्यो, क्रमश: ।

खासमा आहा राराको एउटा इतिहास भनेकै यी टिमले यसरीले पालो पालो उपाधि जित्नु हो । वर्ष ०५८ र ०५९ मा पुलिसले लगातार उपाधि जितेपछि मनाङले यस्तै उपलब्धी ०६० र ०६१ मा दोहराएको थियो । वर्ष ०६२ मा अफ्रिकन युनाइटेड विजेता रह्यो । वर्ष ०६३ मा थ्री स्टार पहिलो विजेता बन्यो । पुलिसले त्यसपछि तीन वर्ष ०६४, ०६५ र ०६६ मा लगातार उपाधि जित्नुको ह्याट्रिक बनायो । वर्ष ०६७ मा थ्री स्टार फेरि च्याम्पियन बन्यो ।

वर्ष ०६८ मा मनाङले उपाधि आत्मसात् गरे लगतै वर्ष ०६९ मा थ्री स्टारले फेरि उपाधिमा आफ्नो नाम लेखायो । वर्ष ०७० ऐतिहासिक रह्यो, किनभने यो वर्ष सहारा च्याम्पियन बन्यो । त्यसपछि फेरि पुरानै क्रम दोहरियो, वर्ष ०७१ मा थ्री स्टारले उपाधि जित्यो, वर्ष ०७२ र ०७३ मा मनाङले लगातार दुई पल्ट च्याम्पियन भएर देखायो । यति मात्र होइन्, मनाङ पाँच, पुलिस चार र थ्री स्टार एक पल्ट फाइनलमा पराजित पनि रहेको छ ।