सुष्माले एएसबीसी बक्सिङ च्याम्पियनसिप खेल्ने

काठमाडौं । नेपालकी बक्सिङ खेलाडी सुष्मा तामाङले उज्वेकिस्तानमा आयोजना हुने एएसबीसी यू-२२ महिला तथा पुरुष बक्सिङ च्याम्पियनसिपमा प्रतिस्पर्धा गर्ने भएकी छिन् ।

तास्कन्त शहरमा आयोजना हुने च्याम्पियनसिपमा सुष्माले ४८ केजी तौल समूहमुनि प्रतिस्पर्धा गर्ने छिन् ।

च्याम्पियनसिपमा सुष्मासँगै प्रमुख प्रशिक्षक प्रकाश थापा मगर र राष्ट्रिय प्रशिक्षक नविन तन्डुकार उज्वेकिस्तान जाने छन् ।

नेपाली टोलीलाई सोमबार युवा तथा खेलकुद मन्त्री महेश्वरजंग गहतराजले बिदाइ गरे ।

सुष्मा प्रकाश दाहाल स्मृति दोश्रो राष्ट्रिय बक्सिङ प्रतियोगिताका स्वर्ण पदक विजेता हुन् ।

यसै वर्ष बैसाखमा पोल्यान्डमा सम्पन्न आइबा युथ बक्सिङ च्याम्पियनसिपमा लिथुवानियाकी खेलाडीलाई पराजित गरी विश्व युवा बक्सिङमा क्वाटरफाइनलसम्म पुगेकी थिइन् ।

अनी विश्व युवा बक्सिङ वरीयतामा उनी छैटौं स्थानमा छिन् ।

बिदाइ कार्यक्रममा नेपाल बक्सिङ संघका अध्यक्ष राम अवाले, वरिष्ठ उपाध्यक्ष अर्जुनबहादुर केसीलगायतको उपस्थिति थियो ।

यही जनवरी २० देखि ३० तारिखसम्म हुने उक्त प्रतियोगितामा एशिया महादेशका २५ भन्दा बढी राष्ट्रको सहभागीता हुनेछ । नेपाली टोली मंगलबार तास्कन्त प्रस्थान गर्दै छ ।