पोखरा । सेन्ट्रल एसिया भलिबल संघ (काभा) का अध्यक्ष मोहमद लाथिफले खेलाडीहरुलाई राज्यस्तरबाट साथ र सहयोग हुनुपर्ने बताएका छन् ।
नेपाल भलिबल संघ र टाइगर ग्रुप अफ पोखराको निमन्त्रणामा नेपाल आएका लाथिफले शनिबार पोखरामा आयोजित साक्षात्कारमा बोल्दै राज्यको साथ र पर्याप्त भौतिक पूर्वाधार भएमात्र खेलाडीहरुले राष्ट्रकालागि खेल्न सक्ने बताए ।
सरकारले भलिबल खेलाडीहरुका लागि मासिक तलबका साथै अन्य सुविधा प्रदान गर्न सके खेलाडीहरुको मनोवल बढने र उनिहरुले खेलमा अझ राम्रो प्रदर्शन गर्न सक्ने उनको भनाइ थियो ।
उनले नेपाल भलिबल संघलाई सहयोग गर्ने प्रतिवद्धता समेत व्यक्त गरे । फरक प्रसंङ्गमा अध्यक्ष लाथिफले नेपालको सुन्दरताले आफूलाई लोभ्याएको बताए । उनले पोखराको प्राकृतिक सुन्दरताको पनि खुलेर प्रशंसा गरे ।
नेपाल भलिबल संघका महासचिव जितेन्द्रबहादुर चन्दले भलिबल नेपालको निकै लोकप्रिय खेल भएको बताउदै यसको अन्तर्राष्ट्रिय क्षेत्रमा व्यापक प्रचारप्रसार गर्नुपर्नेमा जोड दिए ।
उनले सेन्ट्रल एसिया भलिबल संघका अध्यक्ष लाथिफको नेपाल भ्रमणले नेपाली भलिबल खेलको विकासले अझ थप उचाइ लिनेमा पनि विश्वास व्यक्त गरे ।
महासचिव चन्दले नेपाली भलिबलको विकासका लागि सरकारी स्तरबाट कुनै पनि सहयोग नपाएको समेत गुनासो गरे ।
त्यस्तै नेपाल भलिबल संघका सल्लाहकार एवं टाइगर ग्रुप अफ पोखराका अध्यक्ष नारायणप्रसाद शर्माले विषम परिस्थितिका बावजुत पनि प्रतियोगिता आयोजना गरिएको र त्यो सफल भएको बताए ।
उनले लाथिफको भ्रमणले समग्र नेपाली भलिबल खेलप्रेमीहरुलाई हर्षित तुल्याएको उल्लेख गरे ।
नेपाल भलिबल संघका अध्यक्ष मनोरञ्जन रमण शर्माले आफूहरु सदैव भलिबलको वृत्ति विकाशमा लाग्ने बताए । सो अवसरमा (काभा) का अध्यक्ष लाथिफले संघका सल्लाहकार नारायणप्रसाद शर्मालाई खेल सामग्री समेत हस्तान्तरण गरेका थिए ।
कार्यक्रममा प्रदेश खेलकुद परिषद् गण्डकीका उपाध्यक्ष ध्वजकुमार गुरुङ, सदस्य केशव पाठक लगायतको सहभागिता रहेको थियो ।
-1732590134.webp)
