पोखरा । न्यु डायमण्ड स्पोर्ट्स क्लबले दोस्रो संस्करणको टाइगर कप महिला तथा पुरुष भलिबल प्रतियोगिताको महिलातर्फ लगातार दोस्रो जित निकालेको छ ।
पोखरा रंगशालास्थित भलिबल ट्रेनिङ सेन्टरमा मंगलबार आयोजक टाइगर ग्रुपलाई ३-० को सेटमा हराउँदै न्यु डायमण्डले लगातार दोस्रो जित निकालेको हो ।
न्यु डायमण्डले टाइगर ग्रुपलाई २५-१९, २५-१३ र २५-१६ ले हराएको हो ।
यस जितसँगै न्यु डायमण्डले २ खेलमा ६ अंक जोडेको छ । र, अंक तालिकाको शीर्ष स्थानमा उक्लिएको छ ।
पहिलो खेलमा न्यु डायमण्डले विभागीय टोली त्रिभुवन आर्मी क्लबलाई हराएको थियो ।
टाइगर ग्रुप अफ पोखराको आयोजनामा जारी प्रतियोगितामा पुरुषतर्फ ५ र महिलातर्फ ५ गरी कुल १० टिमको सहभागिता रहने छ ।
राउण्ड रोविन लिगको आधारमा जारी प्रतियोगिताको महिला र पुरुष उपाधि विजेता टिमले समान ३÷३ लाख, उपविजेता टिमले १ लाख ५० हजार, तेस्रो हुने टिमले समान ७५ हजार र सान्त्वना हुने टिमले ३५ हजार प्राप्त गर्नेछन् ।
त्यस्तै महिला तथा पुरुषतर्फ उत्कृष्ट खेलाडीलाई समान २५÷२५ हजार तथा हरेक विधाका उत्कृष्ट खेलाडीहरुलाई समान १०÷१० हजारसहित ट्रफी प्रदान गरिने छ ।
