पोखरा । एपीएफ क्लबले दोस्रो टाइगर कप महिला तथा पुरुष भलिबल च्याम्पियनसिपको महिलातर्फ विजयी सुरुआत गरेको छ।
पोखरा रंगशालास्थित भलिबल ट्रेनिङ सेन्टरमा सोमबार भएको खेलमा नेपाल पुलिस क्लबलाई ३-१ को सेटमा हराउँदै एपीएफले सुखद सुरुआत गरेको हो ।
प्रतिस्पर्धात्मक डर्बी भिडन्तमा पहिलो सेट एपीएफले २६-२४ ले जितेको थियो । दोस्रो सेट एपीएफले २५-१८ ले आफ्नो बनायो ।
तेस्रो सेट पुलिसले २५-२३ ले आफ्नो बनाउँदै खेलमा फर्कने कोशिश गर्यो । तर, चौंथो सेट २५-२३ ले आफ्नो बनाउँदै एपीएफले सुखद सुरुआत गरेको हो ।
यस अघि न्यु डायमण्ड स्पोर्ट्स क्लबले त्रिभुवन आर्मी क्लबलाई ३-१ को सेटमा हराएको थियो ।
टाइगर ग्रुप अफ पोखराको आयोजनामा जारी प्रतियोगितामा पुरुषतर्फ ५ र महिलातर्फ ५ गरी कुल १० टिमको सहभागिता रहेको छ ।
राउण्ड रोविन लिगको आधारमा हुने प्रतियोगितामा पुरुषतर्फ विभागीय टिमहरु नेपाल आर्मी क्लब, नेपाल पुलिस क्लब र सशस्त्र प्रहरीको एपिएफ क्लब, हेल्प नेपाल स्पोर्ट्स क्लब र गण्डकी प्रदेशको टिमको सहभागिता रहेको छ ।
त्यस्तै महिलातर्फ नेपाल आर्मी क्लब, नेपाल पुलिस क्लब, एपीएफ क्लब , न्यु डायमण्ड र आयोजक टाइगर ग्रुप अफ पोखराको सहभागिता रहने छ ।
प्रतियोगिताको महिला र पुरुष उपाधि विजेता टिमले समान ३÷३ लाख, उपविजेता टिमले १ लाख ५० हजार, तेस्रो हुने टिमले समान ७५ हजार र सान्त्वना हुने टिमले ३५ हजार प्राप्त गर्नेछन् ।
त्यस्तै महिला तथा पुरुषतर्फ उत्कृष्ट खेलाडीलाई समान २५÷२५ हजार तथा हरेक विधाका उत्कृष्ट खेलाडीहरुलाई समान १०÷१० हजारसहित ट्रफी प्रदान गरिने छ ।
