काठमाडौं । राष्ट्रपति विद्यादेवी भण्डारीले एसियन सिनियर सेन्ट्रल जोन पुरुष तथा महिला भलिबल च्यालेन्ज कपको उपाधि विजेता नेपाली महिला टोलीलाई बधाई दिएकी छिन् ।
सामाजिक संजाल ट्वीटरबाट बुधबार राष्ट्रपति भण्डारीले उपाधि हासिल गरी राष्ट्रको प्रतिष्ठा उँचो बनाएको उल्लेख गर्दै नेपाली टोलीलाई बधाई दिएकी हुन् ।
'एभीसी सेन्ट्रल जोन महिला च्यालेन्ज कप’ मा लगातार दोस्रो पटक उपाधि हासिल गरी राष्ट्रको प्रतिष्ठा उँचो बनाउने नेपाली राष्ट्रिय महिला भलिबल टोलीलाई हार्दिक बधाई ! साथै भविष्यमा निरन्तर सफलताको लागि हार्दिक शुभकामना व्यक्त गर्दछु,' राष्ट्रपतिले भनेकी छिन् ।
यस अघि प्रधानमन्त्री शेर बहादुर देउवा, युवा तथा खेलकुद मन्त्री महेश्वर गहतराजले नेपाली टोलीलाई बधाई दिएका थिए ।
बंगलादेशको ढाका मंगलबार उज्वेकिस्तानलाई ३-२ को सेटमा हराउँदै नेपालको महिला टिम च्याम्पियन बनेको थियो । नेपाल लगातार दोस्रो पटक च्याम्पियन बनेको हो ।
पुरुषतर्फ भने नेपाल चौंथो स्थानमा रह्यो ।
तेस्रो स्थानका लागि भएको खेलमा नेपाल उज्वेकिस्तानसँग ३-० को सेटमा पराजित भयो ।
