नेपाल श्रीलंकासँग पराजित

काठमाडौं । एसियन सिनियर सेन्ट्रल जोन पुरुष तथा महिला भलिबल च्यालेन्ज कपमा नेपालको पुरुष टोली पराजित भएको छ ।

ढाकामा शनिबार भएको खेलमा नेपाल श्रीलंकासँग ३-१ को सेटमा पराजित भएको हो ।

शाहिद शुरवार्दी इन्डोर स्टेडियममा श्रीलंकाले पहिलो सेट २५-१८ ले जितेको थियो ।

तर, दोस्रो सेट नेपालले २५-२२ ले आफ्नो बनायो । त्यसपछि दुई सेटमा श्रीलंकाले २५-१६ र २५-१५ ले जित्दै खेल आफ्नो पक्षमा पार्यो ।

प्रतियोगितामा नेपालको पुरुष टोलीको यो दोस्रो हार हो ।

पहिलो खेलमा नेपाल बंगलादेशसँग ३-० को सेटमा पराजित भएको थियो। तर, दोस्रो खेलमा उज्वेकिस्तानलाई ३-१ को सेटमा हराएको थियो ।

अब नेपालले आइतबार माल्दिभ्सको सामना गर्नेछ ।

 महिला टोलीले भने लगातार तेस्रो जित निकालेको छ ।

आयोजक बंगलादेशलाई ३-० को सोझो सेटमा हराउँदै नेपालले लगातार तेस्रो जित निकालेको हो ।

तुलनात्मक कमजोर टिम बंगलादेशमाथि नेपालले २५-५, २५-१५ र २५-१७ को सेटमा जित निकालेको हो ।

यस जितसँगै नेपाल फाइनल नजिक पुगेको छ ।

अब नेपालले आइतबार उज्वेकिस्तानको सामना गर्नेछ ।

प्रतियोगितामा पुरुषतर्फ ५ र महिलातर्फ ६ राष्ट्रको सहभागिता रहेको छ  ।

पुरुषमा आयोजक बंगलादेश, नेपाल, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।

महिलामा आयोजक  बंगलादेश, नेपाल, किर्गिस्तान, माल्दिभ्स, श्रीलंका र उज्वेकिस्तानले प्रतिस्पर्धा गर्नेछन् ।

राउण्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्नेछ ।

यस्तै तेस्रो र चौंथो टोलीले तेस्रो स्थानको लागि प्रतिस्पर्धा गर्नेछ ।