काठमाडौं ओपन गल्फ : रबिको अग्रता

काठमाडौं । सुर्य नेपाल काठमाडौं ओपन गल्फको तेस्रो दिन रबि खड्काले अग्रता बनाएका छन् ।

रोयल नेपाल गल्फ क्लबमा बुधबार २ अन्डर ६६ स्कोर जोड्दै कुल ७ अन्डर १ सय ९७ अंकसहित रबिले अग्रता बनाएका हुन्।

रबिले नेपालको नम्बर एक भुवन नगरकोटी, दिनेश प्रजापति र जयराम श्रेष्ठमाथि दुई स्ट्रोकको अग्रता बनाएका छन् ।

भुवनले बुधबार १ ओभर ६९ अंक जोड्दा दिनेशले ३ अन्डर ६५ र जयरामले १ अन्डर ६७ अंक जोडे ।

भुवन कुमार रोक्का ३ अन्डर २०१ अंक सहित पाँचौं स्थानमा उक्लिएका छन् ।  

यस्तै एमेच्योर खेलाडी सुवास तामाङ छैटौं स्थानमा झरेका छन् ।  

सुर्य नेपाल गल्फ टुर अन्तर्गतको सिजनको पहिलो प्रतियोगिता सुर्य नेपाल काठमाडौं ओपन गल्फमा ५५ गल्फरले प्रतिस्पर्धा गरिरहेका छन् ।

प्रतियोगिताको विजेताले १ लाख १० हजार नगद पुरस्कार पाउनेछन् । यस्तै उपविजेताले ७४ हजार तथा तेस्रोले ६० हजार पाउनेछन् ।

त्यसबाहेक शीर्ष २१ मा रहने खेलाडीहरुले पनि नगद पुरस्कार पाउने छन् ।