विश्व बक्सिङ च्याम्पियनसिपमा नेपालको सहभागिता हुने

काठमाडौं । सर्बियाको बेलग्रेडमा आयोजना हुने एआईबीए पुरुष विश्व बक्सिङ च्याम्पियनसिपमा नेपालले सहभागिता जनाउने भएको छ ।

नेपाल बक्सिङ संघले आगामी अक्टोबर २५ देखि नोभेम्बर ६ सम्म आयोजना हुने च्याम्पियनसिपमा नेपालको सहभागिता रहने जनाएको छ ।

बक्सिङ संघले च्याम्पियनसिपका लागि छनोट प्रतियोगिता समेत आयोजना गर्ने भएको छ । जसका लागि संघले मान बहादुर भण्डारीको संयोजकत्वमा ५ सदस्यीय छनोट समिति गठन गरेको छ ।

समितिमा राष्ट्रिय खेलकुद परिषद अन्तर्गत तालिम तथा प्रशिक्षण विभाग, राष्ट्रिय टिम तयारी समिति,, बक्सिङ प्रमुख प्रशिक्षक र नेपाल बक्सिङ संघको टेक्निकलबाट एक एक जना सदस्यको रुपमा रहने छन् ।

छनोट प्रतियोगिता असोज १ देखि ३ गतेसम्म हुनेछ ।

छनोटमा ४८-५१ केजी,५४-५७ केजी, ६०-६३.५ केजी, ६३.५-६७ केजी र ६७-७१ केजी तौल समूहमा प्रतिस्पर्धा हुनेछ ।

छनोट प्रतियोगिता सातदोबाटो बक्सिङ हलमा हुनेछ ।