महिला भलिबलकाे गुमेकाे अवसर

काठमाडौं । राष्ट्रिय महिला भलिबल टिमले एसियन महिला भलिबल च्याम्पियनसिप खेल्ने अवसर गुमाएको छ । नेपाल सहित दक्षिण एसियाली मुलुकमा बढेको कोरोना संक्रमणका कारण राष्ट्रिय महिला टिमले पहिलो पटक एसियाली च्याम्पियनसिप खेल्ने अवसर गुमाएको हो ।

एसियन च्याम्पियनसिपलाई लिएर सिंङ्गो भलिबल निकै उत्साहीत देखिन्थ्यो । खेलाडी धेरै उत्साहीत थिए । प्रतियोगिताको तयारीमा जुट्दै गर्दा कप्तान अरुणा शाहीले एसियन च्याम्पियनसिप खेलाडीका लागि राम्रो अवसर हुने बताएकी थिईन् ।

‘एसियन च्याम्पियनसिप खेल्न पाउनु राम्रो अवसर हो । पहिलो पटक सहभागी हुँदैछौं । आफुलाई भाग्यमानी महशुश गरेका छौं ।’ उनले भनेकी थिईन् ।

नेपालले पहिलो पटक एसियन च्याम्पियनसिप खेल्न लागेको थियो । महिला भलिबल खेलाडीले पहिलो पटक देशको प्रतिनिधित्व गर्दै एसियाली प्रतियोगिताको अनुभव बटुल्ने योजना बनाएका थिए । तर अन्तिम समयमा आएर नेपालले प्रतियोगितामा सहभागीता जनाउन नपाउने भयो ।

आयोजक फिलिपिन्सले कोभिडको बढ्दो प्रभावका कारण नेपाल सहितका देशलाई प्रतियोगिताका लागि स्वागत गर्न नसक्ने जानकारी गराएको छ ।

‘लामो समयको तयारी गरेका थियौं । तर फिलिपिन्सले कोरोनाका कारण सहभागी गराउन सक्दैनौं भनेर जानकारी गराएको छ । सोही कारण यस पटक एसियन च्याम्पियनसिप खेल्न नसक्ने भयौं ।’ भलिबल संघका महासचिव जितेन्द्रबहादुर चन्दले भने ।

‘नेपाल मात्र हैन भारतलाई समेत प्रतियोगिता खेल्न रोकेको छ । संघका कारण यो भएको हैन । कोरोनाका कारण खेल्न नपाईने भएको हो ।’ चन्दले थपे ।

राष्ट्रिय खेलको घोषणा भएसंगै नेपालमा भलिबलको लोकप्रियता चुलिएको छ । प्रतियोगिताहरु थपिएका छन् । नयाँ खेलाडी देखिएका छन् । सुतेको भलिबल मुर्झाउन खोजेको देखिन्छ ।

नेपालको महिला टिमले २०७६ सालमा नेपालमा आयोजना भएको १३ औं सागको राम्रो तयारी गरेको थियो । प्रतियोगिता अघि नेपालले थाइल्याण्डमा लामो समयको प्रशिक्षण गरेको थियो । थाइल्याण्डबाटै एभीसी सेन्ट्रल जोन खेल्न बंगलादेशमा गएको थियो । नेपालले प्रतियोगिताको उपाधिनै उचाल्यो । महिला टिमले ऐतिहासिक स्वर्ण पदक जिते । लगत्तै नेपालले घरेलु भूमी आयोजित १३ औं सागमा उत्कृष्ट प्रर्दशन गर्यो । स्वर्ण नजिक पुगेको नेपालले भारतलाई नतिजा सुम्पियो । तरपनि ऐतिहासिक रजत पदक प्राप्त गर्यो ।

एकपछि अर्को अन्तराष्ट्रिय सफलताले महिला टिमको मनोबल र महत्वकाक्षा उच्च देखिन्छ । एसियन भलिबल च्याम्पियनसिपको सहभागीता त्यसैको निरन्तरता थियो ।

कोभिडका कारण झण्डै डेढ वर्ष अबरुद्ध बनेको राष्ट्रिय र अन्तराष्ट्रिय सहभागीतालाई एसियन च्याम्पियनसिपबाट क्रमभंगता गर्ने नेपालको लक्ष्य थियो । तर देशमा बढ्दो कोभिडका संक्रमणका कारण फिलिपिन्सले नेपालमाथि लगाएको प्रतिबन्ध हटाएन । सोही कारण महिला टिम अन्तिम समयमा आएर एसियन च्याम्पियनसिप खेल्नबाट बञ्चित बनेको छ ।

नेपाल भलिबल संघकी उपाध्यक्ष निरोज मास्के नेपालको महिला टिमले ऐतिहासिक उपलब्धि गुमाएको बताउँछिन् ।

‘सबै विषय हाम्रो नियन्त्रणमा थिएन । एसियन च्याम्पियनसिपकै लागि भनेर संघले राम्रो तयारी गरेको थियो । प्रतियोगिताका लागि सबै तयारी पुरा गरेको थियो । कोरोनाका कारण नेपाल प्रतियोगिता खेल्न बञ्चित हुन परेको छ ।’ मास्केले खेलपाटीसंग भनिन् ।

‘खेलाडीलाई घरेलु प्रतियोगिता मात्र नभएर अन्तराष्ट्रिय अनुभव समेत दिलाउन आवश्यक छ । एउटा अवसर गुमेपनि अन्य प्रतियोगिताका लागि संघले पहल गर्छ । खेलाडीले निरन्तर कडा मेहनत र परिश्रम गर्न भने आवश्यक छ ।’ उनले थपिन् ।