काठमाडौं । नेपाल पुलिस क्लबका मुख्य प्रशिक्षक अनन्त राज थापाले बिहीबार बिहानै आफ्ना खेलाडी राष्ट्रिय टोलीमा नपरेको विषयमा टोलीका व्यवस्थापक मधुसुदन उपाध्यायलाई सोधेको र लगत्तै उपाध्यायले आफुलाई फेसबुकमा ‘ब्लक’ गरेको पोष्ट सार्वजनिक गरे ।
कुवेती प्रशिक्षक अब्दुल्लाह अल्मुताइरीको नेपाल आगमनसँगै आफ्ना नियमित खेलाडी र केही अन्य खेलाडी समेत प्रारम्भिक टोलीमा नपरेपछि पुलिस प्रशिक्षक अनन्त थापाले व्यवस्थापक उपाध्यायसंग बुझ्दै आएका थिए । तर प्रश्नको उत्तर नआएर सामाजिक सञ्जाल फेसबुकमै ‘ब्लक’ खानपरेपछि प्रशिक्षक थापाले विवाद बाहिर ल्याए ।
राष्ट्रिय टोलीका मुख्य प्रशिक्षक अब्दुल्लाह अल्मुताइरीले साफ च्याम्पियनसिपका लागि गत हप्ता ५० खेलाडीलाई प्रारम्भिक छनोटमा बोलाए । जसमा फ्रेन्चाइज फुटबल नेपाल सुपर लिग खेलेका र केही प्रतियोगिताबाट बाहिर रहेका खेलाडी टोलीमा परे ।
एनएसएलमा पोखरा थण्डर्स र ए डिभिजन लिगमा पुलिस क्लबबाट उत्कृष्ट प्रदर्शन गर्दै आएका अजित भण्डारी प्रारम्भिक छनोटमै नपरेपछि प्रशिक्षक थापाले प्रश्न गरेका थिए ।
यसअघि राष्ट्रिय टोलीका मुख्य प्रशिक्षक योहान कालिनको दुई वर्षे नेपाल बसाईमा प्राय प्लेईङ सेटमा खेल्दै आएका अजित कुवेती प्रशिक्षकको आगमनसँगै टोली बाहिर रहन पुगेका छन् ।
स्विडिस प्रशिक्षक कालिन आफ्नो पहिलो विदेश भ्रमण कुवेतबाट सुरु गरेका थिए । जसमा दुई मैत्रिपूर्ण खेल खेलाएका उनले अजितलाई प्लेईङ सेटमै डेब्यु गराएका थिए । अजित त्यसयता कालिनले खेलाएको ११ आधिकारीक खेलमा ७ क्याप जितेका छन् । बाँकी एक खेलमा इन्जुरी भए । अन्य खेलमा बेन्चमा रह ।
चैतमा नेपाल झरेका कतारी प्रशिक्षक अब्दुल्लाहले प्रारम्भिक टोलीमा अजितलाई टोली बाहिर राखे । तत्कालिन समय रवि पासवान, संजोक राई, निरज बस्नेत, तेज तामाङ लगायत खेलाडी किन टोलीमा नपरेको भनेर स्पष्टिकरण दिएका अब्दुल्लाहले अजितको बिषयमा भने केही बोलेनन् ।
पुलिसका प्रशिक्षक अनन्त थापाले आफ्ना केही खेलाडी राष्ट्रिय टोलीको प्रारम्भिक छनोटमा परेपनि नियमित खेलिरहेका खेलाडीलाई प्रारम्भिक छनोटमै नबोलाएपछि आफुले ब्यवस्थापक उपाध्यायलाई सोधेको र उनीबाट कुनै पनि उत्तर नआएको र अन्तिममा फेसबुकमै ‘ब्लक’ खान परेको बताए ।
‘यसअघिकै छनोटबाट किन हाम्रो खेलाडी परेन भनेर सोधेको थिए । अन्तिम २३ को कुरा गरेको हैन, त्यो भनेको कोचको हातको कुरा हो । तर यसअघि प्लेईङ सेटबाटै खेल्दै आएको क्लबको खेलाडी प्रारम्भिक ५० मै नपर्नुमा मेरो प्रश्न हो । किन परेन ? के गल्ती भयो ? त्यो त थाहा हुन पर्याे नी ?’ प्रशिक्षक थापाले भने ।
उनले व्यवस्थापक उपाध्यायले पूर्वाग्रही हिसाबमा खेलाडीलाई टोली बाहिर राख्ने गरेको समेत आरोप लगाए ।
‘यसअघि समेत मेरो र उहाँको गफ भएको थियो । उहाँमा नेपाल पुलिस क्लबभित्र इगो छ । सोही कारण पनि खेलाडीलाई पूर्वाग्रही हिसाबले छनोटमा नबोलाएका हो ।’ थापाले भने ।
व्यवस्थापक उपाध्यायले भने ‘ब्लक’ गर्ने या नगर्ने आफ्नो नीजि कुरा रहेको बताए ।
‘मैले कसैलाई ब्लक गरौं या नगरौं यो मेरो कुरा हो ।’ एन्फा केन्द्रिय सदस्य उपाध्यायले भने ।
उपाध्यायले कुन खेलाडीलाई अभ्यासमा बोलाउने, कुनलाई नबोलाउने भनेर आफुले त्यो निर्णय लिने नभएको, जसको निर्णय टेक्निकल टिम, मुख्य प्रशिक्षक, सहायक प्रशिक्षक र गोलरक्षक प्रशिक्षकको हातमा रहेको बताउँदै खेलाडीको व्यवस्थापनमा कुनै कमीकमजोरी भए÷नभएको आफुले हेर्ने बताए ।
‘राष्ट्रिय टोलीमा कुन खेलाडी बोलाउने, कुन नबोलाउने त्यो मेरो विषय हैन । त्यो सबै टेक्निकल टिम र कोच स्टाफले हेर्छ । मेरो काम भनेको ५० खेलाडीको व्यवस्थापन भयो कि भएन, त्यो हेर्न हो ।’ उपाध्यायले भने ।
तपाईले खेलाडीलाई पूर्वाग्रही हिसाबले हेर्नु भयो रे नी ? भन्ने प्रश्नमा भने उपाध्यायले के पूर्वाग्रही भनेको ? त्यो थापालाईनै सोध्नु ।
राष्ट्रिय टिमको प्रारम्भिक प्रशिक्षणमा आफ्ना खेलाडी परेपछि पछिल्लो समय प्रशिक्षकहरुले असन्तुष्टि ब्यक्त गर्न थालेका छन् । खेलाडी छनोटको सम्पुर्ण अधिकार मुख्य प्रशिक्षकसंग रहने भएपनि एन्फाका पदाधिकारीसंग आफ्ना खेलाडी राख्न दबाब दिने क्लबका प्रशिक्षकको सूचि लामै छ ।
एक समय एन्फा पदाधिकारीमाथि राष्ट्रिय टिममा आफ्ना खेलाडी समावेश गर्न हस्तक्षप गरेको आरोप लाग्ने गरेको थियो । तर पछिल्लो समय क्लबका प्रशिक्षकनै आफ्ना खेलाडीको विषयलाई लिएर सार्वजनीक विरोधमा उत्रन थालेका छन् ।
