काठमाडौं । नेपाल भलिबल संघ (एनभीए) ले फिलिपिन्समा आयोजना हुने एसियन सिनियर महिला भलिबल च्याम्पियनसिप र सेन्ट्रल जोन महिला भलिबलका लागि मंगलबारबाट तयारी सुरु गरेको छ ।
नेपालको महिला भलिबल टिम पहिलो पटक एसियन च्याम्पियनसिपमा सहभागी हुन लागेको हो । प्रतियोगितालाई लिएर खेलाडीहरु उत्साहित देखिन्छन् ।
पहिलो दिनको प्रशिक्षण क्रममा बोल्दै कप्तान अरुणा शाहीले पहिलो पटक एसियन च्याम्पियनसिपमा खेल्न लागेको उल्लेख गर्दै प्रतियोगिता आफ्ना लागि अवसर रहेको बताईन् ।
‘एसियन च्याम्पियनसिप खेल्न पाउनु राम्रो अवसर हो । पहिलो पटक सहभागी हुँदैछौँ । हामीले आफुलाई भाग्यमानी सोचेका छौं ।’ कप्तान अरुणाले भनिन् ।
अरुणाकै कप्तानीमा नेपालले बंगलादेशमा भएको एभिसी सेन्टर जोन महिला भलिबलमा स्वर्ण पदक जितेको थियो ।
शाहीले ठुला टोलीविरुद्ध पदक भन्दापनि खेल्न र अनुभव साट्न पाउनुनै अवसर रहेको बताईन् ।
‘पदक भन्दा पनि पहिलो पटक खेल्दैछौं । नेपाल पनि छ भन्ने देखाउँछौं । देशको नाम राख्न खेल्छौं ।’उनले भनिन्, ‘ठुला टिम छन् । अनुभव सँगै राम्रो खेलाडीबाट धेरै कुरा सिक्न पाउँछौं ।’
शाहीले अभ्यास सत्र ढिला सुरु भएपनि चाँडै टिम छनोट गरेर मैत्रीपूर्ण खेल खेल्नुपर्ने बताईन् ।
प्रशिक्षक जगदिश भट्ट र प्रज्वल बहादुर सिंहको छनोट समितिले राष्ट्रिय टिमकालागि प्रारम्भिक ३० खेलाडी छनोट गरेको हो । जसमा पाँच बैकल्पिक खेलाडी समेत राखिएको छ ।
संघले बोलाएको प्रारम्भिक टिममा आर्मीका कप्तान कृपा अधिकारीले २ वर्षपछि राष्ट्रिय टोलीको प्रारम्भिक टिममा स्थान बनाएकी छिन् ।
न्यु डायमण्ड स्पोर्ट्स क्लबका बाल्मिका आचार्य, झरना श्रेष्ठ, रिया कुँवर र रिमा कुवँर पहिलो पटक बन्द प्रशिक्षणमा परेका छन् ।
संघले बैकल्पिक खेलाडीमा भरतपुरकै आरती सुवेदी, निशा चौधरी, डायमण्डकी प्रगती नाथ, ढोरपाटनबाट पुष्पा शाही र नेपाल पुलिसकी पुष्पा चौधरीलाई राखेको छ ।
प्रशिक्षणमा आर्मीबाट सर्वाधिक ८ खेलाडी तथा न्यु डायमण्ड, पुलिस र एपीएफबाट समान ७–७ खेलाडी परेका छन् । यस्तै भरतपुर मेट्रोबाट एक खेलाडी परेका छन् ।
चीनमा हुने तय भएको एसियन च्याम्पियनसिप फिलिपिन्समा सरेको हो । प्रतियोगितामा नेपाल सहित १६ राष्ट्रले प्रतिस्पर्धा गर्नेछन् । प्रतियोगितालाई सन् २०२२ को विश्व च्याम्पियनसिपको छनोटको रुपमा समेत हेरिएको छ ।
प्रतियोगिता अगष्ट २९ देखि सेप्टेम्बर २१ सम्म सञ्चालन हुने एसियन भलिबल महासंघ (एभीसी)ले जनाएको छ ।
राष्ट्रिय भलिबल टिमकी उपकप्तान प्रतिभा भालीले एसियन च्याम्पियनसिप ठुलो अवसर रहेको बताउँदै प्रतियोगिता खेल्न आफु तयार रहेको बताईन् ।
चोटबाट मुक्त हुँदै कोर्टमा फर्किएकी प्रतिभाले आफु पूर्ण रुपमा फिट नभएपनि प्रतियोगितासम्म लयमा आउने बताईन् ।
‘अहिले सम्मको ठुलो अवसर हो । अहिलेसम्म एसियन च्याम्पियनसिप खेलेको रेकर्ड छैन । सबैभन्दा ठुलो अवसर हो ।’ उनले भनिन् ।
‘म पूरा रिकभरी भएको छैन । तर प्रतियोगिताका लागि पुरा तयार छु । यसअघि खेल्न सकेको जति खेल्न सकेको छैन ।’ स्पाईकर प्रतिभाले भनिन् ।
प्रतिभाले एभिसी र साग खेल अघि जस्तै बाहिर गएर तयारी गर्न पाए प्रतियोगितामा उच्च प्रदर्शन गर्न सहयोग पुग्ने बताईन् ।
खेलाडीको बन्द सत्र जेठ २१ गतेबाट सुरु हुने बताईएको थियो । तर कोभिड–१९ को प्रभावका कारण निर्धारित मितिमा प्रशिक्षण अघि बढ्न सकेन ।
गत चैतमा सम्पन्न एनभीए राष्ट्रिय महिला क्लब लिग च्याम्पियनसिपमा उत्कृष्ट प्रदर्शन गरेको आधारमा संघले प्रारम्भिक ३० खेलाडीलाई बन्द प्रशिक्षणमा बोलाएको छ ।
