काठमाडौं । करातेका दीपक श्रेष्ठ, मन्डेकाजी श्रेष्ठ र आर्यन रन्जित शनिबार सम्मानित भएका छन् ।
चौथो जुनियर खुला कराते तथा किक बक्सिङ प्रतियोगिताको समापनका अवसरमा आयोजक नेपाल सितोरियो कराते संघ, छाउनी शाखा डोजोले उनीहरुलाई सम्मान गरेको हो ।
काठमाडौं महानगरपालिकाका मेयर विद्यासुन्दर शाक्य र आयोजक छाउनी डोजोका अध्यक्ष महेश रन्जितले उनीहरुलाई एक कार्यक्रमबीच सम्मान गरे । मन्डे र आर्यनलाई प्रशंसा पत्रसहित माउन्टेन बाइक प्रदान गरियो । दीपक प्रशंसा पत्रबाट सम्मानित भए ।
दीपक आठौं र नवौं दक्षिण एसियाली खेलकुद (साग) का स्वर्ण विजेता हुन् । मन्डेले १३ औं सागमा दोहोरो स्वर्ण जितेका थिए । सागको एकै संस्करणमा दोहोरो स्वर्ण जित्ने मन्डे एक्लो नेपाली कराते खेलाडी हुन् । जुनियर खेलाडी आर्यन विभिन्न अन्तर्राष्ट्रिय प्रतियोगिताका पदक विजेता हुन् ।
सोही अवसरमा करातेकर्मी साइला गमाल, बसन्तराज वाइबा र सिर्जना अधिकारी, सांसद विमल केडिया तथा समाजसेवी सुचित्रा श्रेष्ठ पनि सम्मानित भए ।
केन्द्रीय डोजो दबदबा
चौथो जुनियर खुला कराते तथा किक बक्सिङ प्रतियोगितामा केन्द्रीय डोजोको दबदबा रह्यो । टिम च्याम्पियनको उपाधि जितेको केन्द्रीय डोजोले उत्कृष्ट पुरुष÷महिला र प्रशिक्षकको उपाधिमाथि पनि कब्जा जमायो ।
प्रतियोगितामा १० स्वर्ण, ४ रजत र ५ कांस्यसाथ केन्द्रीय डोजो टिम च्याम्पियन बन्यो । ४ स्वर्ण, १ रजत र १ कांस्यसाथ इचङगु नारायण डोजो दोश्रो तथा ३ स्वर्ण, ३ रजत र ५ कांस्यसाथ नरहरिपुर डोजो तेश्रो भए । शीर्ष तीन स्थान हात पार्ने टिमले क्रमशः २० हजार, १० हजार र ५ हजार नगद पुरस्कार पाए ।
पुरुषमा एओन गहतराज तथा महिलामा रोजिता ढुंगेल उत्कृष्ट खेलाडी घोषित भए । दुवै केन्द्रीय डोजोका खेलाडी हुन् । केन्द्रीय डोजोकै साइला गमाल उत्कृष्ट प्रशिक्षक चुनिए । उत्कृष्टत्रयले पुरस्कार स्वरुप माउन्टेन बाइक पाए । सञ्जय रन्जित उत्कृष्ट निर्णायक ठहरिए । उनले ५ हजार नगद पुरस्कार हात पारे ।
त्रिपुरेश्वरस्थित राष्ट्रिय खेलकुद परिषद्को कभर्डहलमा भएको दुईदिने प्रतियोगितामा २ सय ५० खेलाडीले विभिन्न २२ स्पर्धामा प्रतिस्पर्धा गरेका थिए ।
