साराङ्गे छहारी भलिबल – ढोरपाटनको विजयी सुरुवात

 

काठमाण्डौं । प्रथम साराङ्गे छहारी कप पुरुष भलिबल प्रतियोगिता बुधबारबाट सुरु भएको छ । 

 

काठमाडौंको नयाँ बसपार्कस्थित ढोरपाटन मैदानमा प्रतियोगिता सुरु भएको हो । प्रतियोगिताको पहिलो दिन ४ खेल सम्पन्न भए ।

 

पहिलो खेलमा आरजे ग्रुपले आर आर कलेजलाई पराजित गर्दा ढोरपाटन क्लबले कागेश्वरी गाउँपालिकालाई पराजित गर्याे । 

 

यस्तै, राईजिङ युथ क्लबले त्रिभुवन डोमेस्टिक एरपोर्टलाई हराउँदा पर्वत बडिगाड गाउँपालिकाले आयोजक निलोलाई पराजित गर्याे । 

 

प्रतियोगिताको दोस्रो दिन १० खेल हुनेछन् । 

 

यसअघि प्रतियोगिताको उद्घाटन प्रतिनिधि सांसद तथा नेपाली कांग्रेसका नेता गगन थापाले गरेका थिए । उद्घाटन समारोहलाई सम्बोधन गर्दै उनले आयोजन टोलीले देखाएको मेहनतको कदर गर्दै प्रतियोगिताको सफलताको लागि शुभकामना प्रदान गरे । 

 

‘युवा साथीहरुले क्लब खोलेको ४ महिनामै प्रतियोगिता आयोजना गरेर राम्रो संकेत देखाउनु भएको  छ ।  म प्रतियोगिता सफलताको लागि  शुभकामना ब्यक्त गर्दछु ।’ पूर्व मन्त्री समेत रहेका थापाले भने । 

 

नेपाल भलिबल संघका अध्यक्ष मनोरञ्जन रमण शर्माले युवा टोलीले गरेको कार्यको प्रशंसा गर्दै प्रतियोगिता सफल आयोजना गर्न शुभकामना दिए । 

 

२० टोली सहभागी प्रतियोगिताको विजेताले १ लाख १ हजार १ सय ११ रुपैयाँ प्राप्त गर्नेछ ।

 

यस्तै, उपविजेताले ६१ हजार १ सय ११ प्राप्त गर्दा तेस्रो हुने टोलीले ३१ हजार १ सय ११ रुपैयाँ प्राप्त गर्नेछ ।

 

यस्तै, प्रतियोगिताको उत्कृष्ट डिफेन्डर, उत्कृष्ट ब्लकर, उत्कृष्ट स्पाईकर, उत्कृष्ट क्विकर, उत्कृष्ट सर्भर, उदयमान खेलाडी र उत्कृष्ट लिफ्टरले २५ सय प्राप्त गर्नेछन् ।

 

प्रतियोगिताको सर्वोकृष्ट खेलाडीले ५ हजार तथा उत्कृष्ट प्रशिक्षकले ३ हजार प्राप्त गर्नेछन् ।

 

प्रतियोगितामा बिभाग तथा प्रदेश खेलेका खेलाडीले सहभागीता जनाउन नपाउने नियम रहेको आयोजकले जनाएको छ । 

 

फाइनल खेल अघि मनोरञ्जनात्मक कार्यक्रम समेत रहेको आयोजकले जनाएको छ । हाँस्यकलाकार तथा फिल्मकर्मी केदार घिमिरे (माग्नेबुढा)ले आफ्नो प्रस्तुती देखाउनेछन् ।

 

प्रतियोगिताको मिडिया पार्टनरको रुपमा खेलपाटी डटकम रहेको छ ।