‘एनएसएलले नेपाली फुटबलमा इतिहास कोर्नेछ’

काठमाडौं । नेपाल सुपर लिग (एनएसएल) ले नेपालको इतिहासमा एउटा नयाँ कार्यक्रमको सुरुवात गरेको छ । जसले नेपाली फुटबलमा एउटा इतिहास कोर्ने काम भएको छ । त्यसैले म धेरै खुसी छु । साह्रै हर्षित छु र भावुक पनि ।

कोरोना भन्दा अघि हामीले स्पोर्टस इभेन्ट म्यानेजमेन्टसँग हस्ताक्षर गरि सकेका थियौ। त्यस बेलादेखि कार्यक्रम हुने-नहुने विषयमा धेरैलाई शंका थियो । तर, हामी ढुक्क थियौ ।

एन्फामा अध्यक्षको रुपमा निर्वाचित भएर आइसकेपछि फुटबललाई व्यवसायीकता तर्फ लैजानु पर्छ भन्दै हामीले कार्यक्रम बनायौं । अब व्यवसायीक फुटबलका लागि सर्वप्रथम फुटबलमा व्यापारीक घरानालाई भित्र्याउनुपर्छ भन्ने योजना र सोच राख्यौं ।

त्यसपछि मेरो निर्माण चौधरीसँग भेट भयो । त्यसभन्दा अघि हाम्रो चिनजान थिएन । हामीले एक अर्काको नाम सुनेका थियौ । तर, औपचारिक रुपमा भेट भएको थिएन । उहाँले मसँग भेट हुनु पूर्व पनि फुटबलमा लगानी गरिसक्नु भएको थियो । बिचमा उहाँ खाली बस्नुभएको थियो । उहाँलाई फुटबलमा ल्याउनु पर्छ भन्ने सोच्यौं ।

हाम्रो चिनजान नभएकाले मैले सुरुमै उहाँलाई फोन गर्ने आँट गरिन । किनभने नचिनेको नम्बर उहाँले उठाउनु हुन्न भन्ने लागेको थियो । त्यसपछि एउटा म्यासेज छोडे । म्यासेज छोडे लगत्तै उहाँले फोन गर्नुभयो । त्यसको दोस्रो दिननै उहाँकै कार्यालयमा हाम्रो भेटघाट भयो । भेटघाटमा म निकै उत्साहित भएको थिए ।

उहाँले नेपाली फुटबलको व्यवसायीकता मात्र हैन, फुटबल विकासको विषयमा समेत चर्चा गर्नुभयो । त्यसपछि हामीले फुटबल विकासका लागि युवा विकास आवश्यक भएको छलफल गयौं । त्यसलाई तुरुन्तै सहकार्य गर्ने निर्णय गर्यौ ।

सोही निर्णय अनुसार गत वर्ष हामीले अन्तर विद्यालय क्विक्स कपको आयोजना गर्यौ । त्यसमा करिब २३ वटा स्कुलको सहभागिता रहेको थियो । छोटो समयमा नै हामीले प्रतियोगिता गर्न सफल भयौ र उत्साहित भयौ । त्यसपछि हामीले धेरैभन्दा धेरै स्कुललाई सो प्रतियोगितामा सहभागिता गराउने योजना थियो । तर, कोरोना भाइरस महामारीका कारण त्यसलाई निरन्तरता दिन सकेनौ । अब आउने वर्षमा हामी त्यसलाई पनि निरन्तरता दिने छौँ ।

आईतबार फ्रेन्चाईज टिम र टिम मालिक सार्वजनिक भएको एनएसएल निकै प्रतिक्षाको खेल बनेको छ । जसको औपचारिक सुरुवात आजबाट भएको छ । एनएसएलमा सहभागी हुने क्लबका मालिकदेखि म निकै उत्साहित छु ।

अब साच्चै यसले नेपाली फुटबललाई व्यवसायीकतर्फ लैजाने मैले विश्वास लिएको छु । तर, यसमा ठुलो माछा आयो, सानो माछालाई खाईदिन्छ भनेर धेरैले शंका गरेका छन् । कोही डराउन आवश्यक छैन । हामी नेपालमा चलिरहेको लिगलाई पनि व्यवस्थित बनाउँदै छौ । यसको पनि समय केही लम्ब्याउने छौ । यससँगै एनएसएललाई पनि व्यवस्थित गर्दै लैजाने छौँ ।

पहिलो सिजनमा हामीले एनएसएललाई दुइ महिनाको समय दिएका छौ । हामीले यस प्रतियोगितालाई पूर्व सोच अनुसार गर्न सकेको छैनौं । तर, अर्को सिजनमा हामीले यसलाई व्यापक पार्ने छौ । हामी यसलाई अर्को सिजनमा होम एण्ड अवेको आधारमा लैजाने छौँ । एन्फाको तर्फबाट आयोजक टिमलाई सदैब साथ दिन तयार छौ । यो तपाईको कार्यक्रम नभई एन्फाको कार्यक्रम जस्तै सोचेर सहयोग गर्ने विश्वास दिलाउन चाहन्छु । प्रतियोगिताका दौरान आउने कुनै पनि समस्या समाधानका लागि तयार छौ ।

खेलाडी रिलिज गर्न, ठाउँको व्यवस्थापन, मैदानको व्यवस्थापन, टेक्निकल सहयोगका लागि हामी सधै तयार छौं । हाल आयोजकसँग हामीले चार बर्षका लागि सम्झौता गरेका छौं । चार वटा सिरिजका लागि ढिलै भएपनि शुभ सुरुवात भएको छ । यो सुरुवातले साँच्चैनै नेपाली फुटबललाई एउटा गन्तव्यमा पुर्याउने विश्वास लिएको छु । धेरै साथीहरुले मलाई सोध्ने गरेका छन् । यो प्रतियोगिता यसपालि मात्रै हुन्छ की अन्य वर्ष पनि ?

तर, मैले प्रति प्रश्न गर्दै यसपलि सुरुवात हुन्छ, यसको अन्त्य मलाई पनि थाहा छैन ।

हाम्रो देशमा बालकदेखि बृद्धासम्म फुटबल समर्थक धेरै छन् । उनीहरु फुटबल हेर्न बसिरहेका हुन्छन् । यसको उदाहरण गाउँमा हुने साना–साना प्रतियोगिताले देखाएको छ । जहाँ हजारौ मानिस फुटबल हेर्नका लागि मैदानमा पुगेका हुन्छन् । अब एनएसएलले त्यो समर्थकको लोकप्रियतालाई झन बढवा दिनेछ ।

(नेपाल सुपर लिग फुटबलको टिम र टिम मालिक सार्वजनिक कार्यक्रममा अखिल नेपाल फुटबल संघ (एन्फा) का अध्यक्ष कर्मा छिरिङ शेर्पाको मन्तब्यको सम्पादीत अंश )