‘गोल्डेन एथ्लेटिक्स मिट’ फागुनमा

काठमाडौं । ‘गोल्डेन एथ्लेटिक्स मिट’ प्रतियोगिता फागुन २९ गते शनिबार आयोजना हुने भएको छ ।

काठमाडौं जिल्ला एथ्लेटिक्स संघ, ललितपुर जिल्ला एथ्लेटिक्स संघ र भक्तपुर जिल्ला एथ्लेटिक्स संघको संयुक्त आयोजनामा हुने एथलेटिक्स मिटमा सिनियरतर्फ महिला र पुरुषको ५ इभेन्ट र जुनियरतर्फ ३ इभेन्ट समावेश गरिएको छ ।

त्रिपुरेश्वरस्थित दशरथ रंगशालामा आयोजना हुने एथ्लेटिक्स मिटमा सिनियरतर्फ १ सय मिटर, २ सय मिटर, ४ सय मिटर, ८ सय मिटर र तीन हजार मिटर दौड समावेश छ । यस्तै जुनियरतर्फ १ सय मिटर,४ सय मिटर र ८ सय मिटरमा प्रतिस्पर्धा हुनेछ ।

प्रो स्पोर्ट्स प्रालिको संयोजकत्वमा हुने प्रतियोगिताको पहिलो, दोस्रो र तेस्रो हुनेले क्रमश: ७ हजार, ५ हजार र ३ हजार नगद प्राप्त गर्ने छन् ।

प्रतियोगितामा विभागीय टिमका खेलाडीका साथै अन्य निकायका खेलाडीले प्रतिस्पर्धा गर्न पाउने छन् ।

प्रतियोगिता सञ्चालन गर्न करिब ७ लाख रुपैयाँ खर्च हुने आयोजकले जनाएको छ ।