विश्वकपमा गोल गर्ने अवसर गुमाएपछि फुटबलरलाई ज्यान मार्ने धम्की
काठमाडौं। फिफा विश्वकपबाट बाहिरिएपछि उत्पन्न हुने निराशाले कहिलेकाहीँ मैदानबाहिर पनि गम्भीर रूप लिने गर्छ।
कोलम्बियाका विंगर हामिन्तोन काम्पासको घटनाले त्यसको पछिल्लो उदाहरण प्रस्तुत गरेको छ। अन्तिम १६ को खेलमा महत्त्वपूर्ण गोल गर्ने अवसर गुमाएपछि उनले ज्यान मार्ने धम्की प्राप्त गर्न थालेका छन्। सुरक्षा जोखिम बढेपछि २६ वर्षीय काम्पास आत्मगोपनमा जान बाध्य भएका छन्।
स्विट्जरल्यान्डविरुद्धको अन्तिम १६ को खेलमा अतिरिक्त समयमा काम्पासले गोल गर्ने उत्कृष्ट अवसर पाएका थिए। तर उक्त अवसरलाई गोलमा परिणत गर्न नसकेपछि खेल टाइब्रेकरसम्म पुगेको थियो। टाइब्रेकरमा स्विट्जरल्यान्ड विजयी हुँदै क्वार्टरफाइनलमा प्रवेश गर्यो भने कोलम्बियाको विश्वकप यात्रा त्यहीँ समाप्त भयो।
खेलपछि टोलीसँगै बोगोटा फर्किने तय भएको विमानमा काम्पास सवार भएनन्। त्यसपछि उनको अवस्थाबारे विभिन्न अड्कलबाजी सुरु भयो। कोलम्बियन फुटबल महासंघले घटनाप्रति गम्भीर चिन्ता व्यक्त गर्दै धम्की दिने व्यक्तिहरूको कडा आलोचना गरेको छ।
आत्मगोपनमा रहेकै अवस्थामा काम्पासले इन्स्टाग्राममार्फत भावुक सन्देश सार्वजनिक गरेका छन्। उनले लेखेका छन्, “सानैदेखि कोलम्बियाको जर्सी लगाउने, राष्ट्रिय गानसँग मैदानमा उभिने, लाखौं समर्थकको प्रतिनिधित्व गर्ने र विश्वकपमा गोल गर्ने मेरो सपना थियो।”
समर्थकहरूप्रति उनले थप लेखेका छन्, “हामी सबैले चाहेको खुसी दिलाउन नसकेकोमा म अत्यन्त दुःखी छु। तर यो जर्सीप्रतिको मेरो समर्पण, प्रतिबद्धता र प्रेममा कहिल्यै कमी थिएन। मैदानमा मैले आफ्नो सम्पूर्ण क्षमता दिखाएको छु र देशका लागि यही जिम्मेवारी म हजारौं पटक फेरि पनि निभाउन तयार छु।”
काम्पासले यस विश्वकपमा उज्बेकिस्तानविरुद्ध एक गोल गरेका थिए। तर अन्तिम १६ को खेलमा गुमाएको एउटा अवसरले उनलाई अहिले अत्यन्त कठिन परिस्थितिमा पुर्याएको छ।
यो घटनाले धेरैलाई सन् १९९४ को विश्वकपको दर्दनाक स्मृति पनि सम्झाएको छ। त्यसबेला आत्मघाती गोल गरेका कारण कोलम्बियाका डिफेन्डर आन्द्रेस एस्कोबार देश फर्किएपछि हत्या भएका थिए। उक्त घटना आज पनि फुटबल इतिहासका सबैभन्दा दुःखद अध्यायमध्ये एक मानिन्छ।
कोलम्बियन फुटबल महासंघले विज्ञप्तिमार्फत भनेको छ, “देशको प्रतिनिधित्व गर्ने कुनै पनि खेलाडी वा उनका परिवारका सदस्यले धम्कीको सामना गर्नुपर्ने अवस्था आउनु हुँदैन।” महासंघले काम्पास र उनको परिवारको सुरक्षा सुनिश्चित गर्न सम्बन्धित निकायसँग आग्रह पनि गरेको छ।
