सन् २०३० को विश्वकपमा ६४ टोली?

काठमाडौं। फिफा विश्वकप अझ ठूलो हुने संकेत देखिएको छ। ३२ टोलीबाट ४८ टोलीमा विस्तार गरेपछि अब ६४ टोली सहभागी हुने विश्वकपको सम्भावनाबारे छलफल सुरु भएको छ।

फिफाका अध्यक्ष जियानी इन्फान्टिनोले सन् २०३० को विश्वकप ६४ टोलीको ढाँचामा आयोजना हुन सक्ने बताएका छन्। यद्यपि, यो प्रस्ताव अहिले प्रारम्भिक छलफलको चरणमा मात्रै रहेको उनले स्पष्ट पारे।

संयुक्त राज्य अमेरिका, क्यानडा र मेक्सिकोको संयुक्त आयोजनामा हुने सन् २०२६ को विश्वकप पहिलो पटक ४८ टोलीको नयाँ ढाँचामा आयोजना भइरहेको छ। यसअघि सन् १९९८ देखि २०२२ सम्म विश्वकपमा ३२ टोलीले मात्र सहभागिता जनाउँदै आएका थिए। तर विश्वकपको शतवार्षिकी संस्करणलाई अझ भव्य बनाउन ६४ टोलीको प्रस्ताव फिफासमक्ष पुगेको छ।

ऐतिहासिक सन् २०३० को विश्वकप तीन महादेशका ६ देशमा आयोजना हुनेछ। उद्घाटन चरणका खेलहरू पहिलो विश्वकप आयोजक उरुग्वे, वर्तमान विश्व विजेता अर्जेन्टिना तथा कोन्मेबोल मुख्यालय रहेको पाराग्वेमा हुनेछन्। त्यसपछि बाँकी खेलहरू मोरक्को, स्पेन र पोर्चुगलमा सञ्चालन गरिनेछन्।

स्विस सञ्चारमाध्यम ब्लुइनसँगको अन्तर्वार्तामा इन्फान्टिनोले सन् २०२६ को विश्वकप समाप्त भएपछि ६४ टोलीको ढाँचाबारे फिफाका सम्बन्धित समितिहरूले विस्तृत छलफल गर्ने जानकारी दिए। उनका अनुसार विश्वकप केवल युरोप वा दक्षिण अमेरिकाको प्रतियोगिता नभई सम्पूर्ण विश्वको साझा उत्सव हो।

इन्फान्टिनोको विश्वास छ कि थप राष्ट्रहरूलाई विश्वकपमा अवसर प्रदान गरिए विश्व फुटबलको विकास अझ तीव्र हुनेछ। उनका अनुसार साना राष्ट्रहरूले विश्वकपमा पुग्ने वास्तविक सम्भावना देखेपछि उनीहरूले आफ्नो फुटबल पूर्वाधार र विकास कार्यक्रममा थप लगानी गर्नेछन्।

फिफा अध्यक्षले ४८ टोलीको विश्वकप लागू गर्ने निर्णय ‘शतप्रतिशत सफल’ भएको दाबी गरेका छन्। तर टोली संख्या बढाउने निर्णयको आलोचना पनि भइरहेको छ। आलोचकहरूका अनुसार यसले विश्वकप छनोट प्रतियोगिताको महत्त्व घटाउन सक्छ र मुख्य प्रतियोगिताको प्रतिस्पर्धात्मक स्तरमा पनि असर पर्न सक्छ।

यसअघि फिफाले विश्वकपलाई प्रत्येक चार वर्षको सट्टा दुई–दुई वर्षमा आयोजना गर्ने प्रस्तावसमेत अघि सारेको थियो। तर व्यापक विवाद र आलोचनापछि उक्त योजना स्थगित गरिएको थियो।