मुख्यमन्त्री कप : सेमिफाइनल समीकरण पूरा

पोखरा । पोखरामा जारी मुख्यमन्त्री कप गण्डकी प्रदेशस्तरीय भलिबल प्रतियोगिताको सेमिफाइनल समीकरण पूरा भएको छ ।

पोखरा रंगशालामा बिहीबार भएको क्वाटरफाइनलका खेलहरु सकिएसँगै सेमिफाइनल पुग्ने पुरुष र महिला टोलीको टुंगो लागेको हो ।

पुरुषतर्फ स्याङ्जा, पर्वत, म्याग्दी र तनहुँ सेमिफाइनलमा पुगेका छन् ।

पहिलो क्वाटरफाइनलमा स्याङ्जा बाग्लुङमाथि २५–२० र २७–२५ को सेटमा हरायो ।

पर्वतले भने गोर्खाबाट वाकओभर पाएको थियो ।

यस्तै म्याग्दीले कास्कीलाई २५–१९ र २५–१२ को सोझो सेटमा पराजित गर्यो ।

अन्तिम क्वाटरफाइनलमा तनहुँले नवलपुरलाई २५–१८ र २५–२० को सेटमा पराजित गर्यो ।

अब सेमिफाइनल स्याङ्जा र पर्वत तथा म्याग्दी र तनहुँ भिड्ने छन् ।

महिलातर्फ म्याग्दी, तनहुँ, कास्की र पर्वत सेमिफाइनलमा प्रवेश गरेका छन् ।

पहिलो क्वाटरफाइनलमा म्याग्दीले स्याङ्गजामाथि २५-५ र २८-२६ को सेटमा जित निकाल्यो ।

तनहुँले मुस्ताङलाई २५-६ र २५-९ ले हरायो ।

पर्वतले नवलपुरलाई २५-८ र २५-९ ले पराजित गर्यो ।

त्यस्तै आयोजक कास्कीले बाग्लुङमाथि २-१ को सेटमा जित निकाल्यो ।

पहिलो सेट १९-२५ ले गुमाएको कास्कीले त्यसपछिको सेट २५-२३ र २५-१८ ले जित्दै सेमिफाइनलमा स्थान पक्का गरेको हो ।

अब सेमिफाइनलमा म्याग्दी र तनहुँ तथा पर्वत र कास्की भिड्ने छन् ।

प्रतियोगिताको विजेता महिला र पुरुष टोलीले समान २–२ लाख र ट्रफी पुरस्कार प्राप्त गर्नेछन् भने उपविजेताले १–१ लाख पुरस्कार प्राप्त गर्ने आयोजकले जनाएको छ ।

तेस्रो हुने टोलीले समान ५० हजार प्राप्त गर्ने छन् ।

प्रतियोगिताको सर्वोकृष्ट खेलाडी, उत्कृष्ट सेटर, डिफेण्डर, स्पाइकर र लिफ्टरले ५–५ हजार पाउने छन् ।