पोखरा । नेपाल पुलिस क्लबले टाइगर कप आमन्त्रित राष्ट्रिय क्लब भलिबल च्याम्पियनसिप अन्तर्गत महिलातर्फको उपाधि जितेको छ ।
पोखरा रंगशालामा शनिबार भएको फाइनलमा एपीएफ क्लबलाई ३-० को सोझो सेटमा पराजित गर्दै पुलिस च्याम्पियन बनेको हो ।
उपाधि जित्ने क्रममा पुलिसले डर्बी क्लब एपीएफमाथि २५-२२, २५-२२ र २५-२१ को सेटमा जित निकाल्यो ।
पुलिस एपीएफमाथि लगातार दोस्रो भेटमा जित निकाल्दै च्याम्पियन बनेको हो । लिग चरणको भेटमा पनि पुलिस ३-० ले नै विजयी भएको थियो ।
यससंगै पुलिसले लगातार दोस्रो उपाधि जितेको हो । गत वर्ष पीएम कप भलिबलमा एपीएफलाई नै हराएर पुलिसले उपाधि जितेको थियो ।
उपाधिसँगै पुलिसले १ लाख ५० हजार प्राप्त गरेको छ । उपविजेता बनेको एपीएफले ७५ हजारमा चित्त बुझायो ।
पुरुषतर्फको फाइनलमा विभागीय टिम त्रिभुवन आर्मी क्लब र गण्डकी प्रदेशबीच प्रतिस्पर्धा हुनेछ ।
आर्मी र गण्डकीबीचको उपाधि भिडन्त आजै हुनेछ ।
