एपीएफलाई हराउँदै गण्डकी फाइनलमा

पोखरा । गण्डकी प्रदेश पोखरामा जारी टाइगर कप आमन्त्रित राष्ट्रिय क्लब भलिबल च्याम्पियनसिपको पुरुषतर्फ फाइनलमा प्रवेश गरेको छ ।

पोखरा रंगशालामा शुक्रबार भएको समूह चरणको अन्तिम खेलमा एपीएफ क्लबलाई ३-० को सेटमा पराजित गर्दै गण्डकी फाइनलमा प्रवेश गरेको हो ।

पुरुषतर्फ फाइनल पुग्ने पहिलो टिम बन्ने क्रममा गण्डकीले एपीएफलाई २५-२१, २९-२७ र २५-१५ ले पराजित गर्यो ।

जितसंगै ३ खेलमा ६ अंक जोडेर गण्डकी फाइनल पुगेको हो ।

पहिलो खेलमा नेपाल पुलिस क्लबसँग पराजित गण्डकीले दोस्रो खेलमा त्रिभुवन आर्मी क्लबलाई हराएको थियो ।

एपीएफ भने प्रतियोगिताबाट बाहिरिएको छ ।

अब गण्डकीले फाइनलमा पुलिस र आर्मीबीचको विजेतासँग खेल्नेछ ।

राउण्ड रोबिनको आधारमा जारी प्रतियोगितामा महिला र पुरुषमा समान ४/४ टोलीको सहभागिता रहेको छ ।

टाइगर ग्रुप अफ पोखराले आयोजना गरेको प्रतियोगिताको विजेता महिला तथा पुरुष टिमले समान १ लाख ५० हजार पाउने छन् ।

यस्तै उपविजेताले ७५ हजार तथा तेस्रोले नगद ३५ हजारका साथमा मेडल, ट्रफी र प्रमाण पत्र प्राप्त गर्ने छन् ।

सान्त्वना पुरस्कार १५ हजार राखिएको छ ।

यस्तै सर्वोत्कृष्ट महिला तथा पुरुष खेलाडीले समान २०–२० हजार प्राप्त गर्ने छन् । त्यस्तै उत्कृष्ट सर्भर, उत्कृष्ट सेटर, उत्कृष्ट ब्लकर, उत्कृष्ट डिफेण्डर तथा स्पाइकर महिला तथा पुरुष खेलाडीले समान ५–५ हजार नगद प्राप्त गर्ने छन् ।