आर्मीको पहिलो जित

पोखरा । त्रिभुवन आर्मी क्लबले पोखरामा जारी टाइगर कप आमन्त्रित राष्ट्रिय क्लब भलिबल च्याम्पियनसिपको पुरुषतर्फ पहिलो जित निकालेको छ ।

पोखरा रंगशालामा बिहीबार भएको खेलमा एपीएफ क्लबलाई ३-० को सोझो सेटमा हराउँदै आर्मीले पहिलो जित निकालेको हो ।

पहिलो जित निकाल्ने क्रममा आर्मीले एपीएफमाथि २५-२३, २५-२१ र २५-१८ को सेटमा जित निकाल्यो ।

जितसँगै आर्मीले २ खेलमा ३ अंक जोडेको छ । र, आर्मीले फाइनलमा पुग्न सम्भावना कायम राखेको छ ।

पहिलो खेलमा आर्मी गण्डकी प्रदेशसँग ३-१ को सेटमा पराजित भएको थियो ।

अब आर्मीले लिगको अन्तिम खेलमा नेपाल पुलिस क्लबसँग शुक्रबार खेल्नेछ ।

महिलातर्फ बिहीबार होङग्वान्जी न्यु डाईमण्ड स्पोर्ट्स क्लब र एपीएफ क्लबले जित निकाल्यो ।

लगातार दोस्रो जित निकाल्ने क्रममा न्यु डाईमण्डले नेपाल पुलिस क्लबलाई ३-१ को सेटमा पराजित गर्यो ।

न्यु डाईमण्डले पुलिसमाथि २७-२५ , ३१-२९, २७-२५ र २५-१६ को सेटमा जित निकालेको हो ।

यस जितसँगै न्यु डाईमण्डले २ खेलमा ५ अंक जोडेको छ । र, न्यु डाईमण्डले फाइनलमा पुग्ने सम्भावना बलियो बनाएको छ ।

पुलिसको भने यो पहिलो हार हो । तर, पुलिस ३ खेलमा ६ अंक जोडेर फाइनलमा प्रवेश गरिसकेको छ ।

अब न्यु डाईमण्ड र एपीएफ मध्ये एक टिम फाइनल पुग्नेछ । न्यु डाईमण्ड र एपीएफबीचको खेल शुक्रबार हुनेछ ।

एपीएफले २ खेलमा २ अंक जोडेको छ ।

एपीएफले बिहीबार नै त्रिभुवन आर्मीमाथि १८-२५, २७-२५, २५-१७, २०-२५ र १५-७ को सेटमा जित निकालेको थियो ।

आर्मी भने लगातार तेस्रो हारसंगै प्रतियोगिताबाट बाहिरिएको छ ।

राउण्ड रोबिनको आधारमा जारी प्रतियोगिताको शीर्ष दुई टोलीले उपाधिका लागि खेल्नेछन् ।

टाइगर ग्रुप अफ पोखराले आयोजना गरेको प्रतियोगितामा महिला र पुरुषमा समान ४/४ टोलीको सहभागिता रहेको छ ।

प्रतियोगिताको विजेता महिला तथा पुरुष टिमले समान १ लाख ५० हजार, द्वितियले ७५ हजार तथा तृतियले नगद ३५ हजारका साथमा मेडल, ट्रफी र प्रमाण पत्र प्राप्त गर्ने आयोजकले जनाएको छ ।

त्यसैगरी सान्त्वना पुरस्कार १५ हजार राखिएको छ ।

यस्तै सर्वोत्कृष्ट महिला तथा पुरुष खेलाडीले समान २०–२० हजार प्राप्त गर्ने छन् । त्यस्तै उत्कृष्ट सर्भर, उत्कृष्ट सेटर, उत्कृष्ट ब्लकर, उत्कृष्ट डिफेण्डर तथा स्पाइकर महिला तथा पुरुष खेलाडीले समान ५–५ हजार नगद प्राप्त गर्ने छन् ।