काठमाडौं । प्रथम महाङ्काल च्याम्पियनसिप अन्तर वडा भलिबल प्रतियोगिता फागुन दोस्रो साताबाट सुरु हुने भएको छ ।
आयोजक महाङ्काल सामाजिक स्पोर्ट्स क्लबको आयोजनमा हुन लागेको दुई दिने प्रतियोगिता ललितपुरस्थित महाङ्काल गाउपालिका वडा नम्बर ३ र ४ मा हुनेछ ।
"महाङ्कालको प्रतिबद्धता सुशासन समृद्ध हाम्रो गाउपालिका" भन्ने नाराका साथ हुन लागेको प्रतियोगिताको उद्घाटन फागुन ८ गते हुनेछ । यस्तै समापन कार्यक्रम भने फागुन १५ गते हुनेछ ।
आयोजक महाङ्काल सामाजिक स्पोर्ट्स क्लबका अध्यक्ष डम्बर बहादुर स्याङ्तानको अनुसार खेल दुई शनिबार हुनेछन् ।
'विद्यालयको प्राङ्गणमा प्रतियोगिता आयोजना गर्दैछौं । त्यसैले विद्यालय समस्या नपर्ने गरि प्रतियोगिता दुई शनिबार हुनेछ,' उनले खेलपाटीसँग भने ।
खेल महाङ्काल उच्च माबिको खेल मैदानमा हुनेछ ।
प्रतियोगिताको विजेताले ३० हजारसहित मेडल कप र प्रमाणपत्र प्राप्त गर्नेछ । यस्तै दोस्रो हुनेले १५ हजार प्राप्त गर्दा तेस्रो हुनेले १० हजार प्राप्त गर्नेछ । चौथो हुनेले समेत ५ हजार पुरस्कार पाउने आयोजकले जनाएको छ ।
प्रतियोगितामा सहभागी टोलीले प्रबेश दर्ता बापत २ हजार नगद आयोजकलाई बुझाउनुपर्नेछ ।
यस्तै प्रतियोगिताको भाग्यमानी दर्शकले ३ हजार प्राप्त गर्ने आयोजकले जनाएको छ ।
