काठमाडौं । अखिल नेपाल फुटबल संघ (एन्फा)ले पदाधिकारी मनोनयनको ब्यवस्थालाई खारेज गरेको छ ।
मंगलबार काठमाडौंमा सम्पन्न एन्फाको १९ औं साधारण सभाले संघमा मनोनयनको ब्यवस्थालाई खारेज गर्दै २१ सदस्यीय नयाँ कार्यसमितिको ब्यवस्था गरेको छ ।
प्रवक्ता किरण राईका अनुसार अर्को साधारण सभाबाट बन्ने कार्यसमितिमा संशोधित विधान लागु हुनेछ ।
‘नयाँ कार्यसमितिका सबै पदाधिकारी निर्वाचनमार्फतनै आउनेछन् । अहिलेसम्म जे भएपनि अब मनोनयनको ब्यवस्थामा बन्देज लागेको छ ।’ उनले भने ।
निर्वाचनमार्फत आउने २१ सदस्यीय नयाँ कार्यसमितिमा २ जना महिला अनिवार्य गरिएको छ ।
यसअघि एन्फामा १७ सदस्यीय निर्वाचित कार्यसमितिको ब्यवस्था गरेको थियो । तर अध्यक्षको तजबिजमा संघभित्र पदाधिकारी मनोनयनको बेतिथी थियो । नेतृत्वले मान्छे रिझाउन आफु अनुकुलका ब्यक्तिलाई पदाधिकारीमा नियुक्त गर्दै आएका थिए ।
यस्तै, एन्फाको संशोधित विधान अनुसार वरिष्ठ उपाध्यक्ष निर्वाचनमार्फतनै टुङ्गो लाग्ने भएको छ । साधारण सभाले वरिष्ठ उपाध्यक्षको समेत निर्वाचनबाटै टुङ्गो लगाउने निर्णय गरेको हो । यसअघि निर्वाचित ४ उपाध्यक्षमा एक जनालाई वरिष्ठ उपाध्यक्ष मनोनयन गर्ने ब्यवस्था रहेको थियो ।
साधारण सभाबाट संशोधित विधान अनुसार अध्यक्ष सहित, १ वरिष्ठ उपाध्यक्ष, ४ उपाध्यक्ष र महिला सहित १५ जना सदस्य निर्वाचनबाट आउनेछन् ।
फिफाको निर्देशन अनुसार एन्फाले मनोनितको कोटालाई बन्देज लगाउँदै सबै कार्यसमिति निर्वाचनमार्फत चुनिने ब्यवस्था गरेको हो ।
यस्तै, बैठकले एन्फाको वार्षिक बजेटलाई समेत पारित गरेको हो । राष्ट्रिय लिग सहितका एन्फाको ८२ करोड ६६ लाख ४२ हजार रुपैयाँको वार्षिक कार्यक्रमलाई साधारण सभाले पारित गरेको हो ।
एन्फाको वार्षिक क्यालेन्डरलाई खेलपाटीले यसअघिनै सार्वजनीक गरेको थियो ।
साधारण सभाले गत आर्थिक वर्षको बजेटको समेत समिक्षा गरेको थियो । गत वर्ष एन्फाले ४० करोड २६ लाख आम्दानी गरेको छ भने ४१ करोड २६ लाख रुपैयाँ खर्च गरेको प्रवक्ता राईले बताए ।
