चितवन । नेपालमा सम्पन्न १३ औं दक्षिण एसियाली खेलकुद (साग) मा पदक विजेता चितवन जिल्लाका तेक्वान्दो खेलाडी सम्मानित भएका छन् ।
चितवन जिल्ला तेक्वान्दो कार्यसमितिले बिहीबार सागमा पदक विजेता आफ्ना जिल्लाका खेलाडीलाई सम्मान गरेको हो ।
चितवनको सौराहस्थित आफ्नै प्रशिक्षण केन्द्रमा कार्यसमितिले सागमा स्वर्ण विजेता र कांस्य विजेता समान २/२ खेलाडी र उत्कृष्ट खेलाडी उत्पादन गर्न सफल प्रशिक्षकलाई सम्मानित गरेको हो ।
गत मंसिरमा सम्पन्न सागमा चितवनकी संगीता बस्याल र पार्वती गुरुङले स्वर्ण जितेकी थिइन् । यस्तै शिशिर श्रेष्ठ र जितबहादुर बोटले कास्य जितेका थिए ।
संगीताले फाइटतर्तफ ६२ केजी तौलसमूह र पार्वतीले २४–२९ वर्षउमेर समूहको व्यक्तिगत पुम्सेमा नेपाललाई स्वर्ण पदक दिलाएका थिए । जितबहादुरले २९ वर्षमुनि पार्वतीसँगको पेयर पुम्से र पुरुष टिमको पुम्सेमा कांस्य जितेका थिए । शिशिरले भने २३ वर्षमुनि टिम पुम्से कांस्य जितेका थिए ।
१३ औं सागमा पदक विजेता चारै खेलाडीलाई नगद १० हजार रुपैयाँसहित सम्मान गरिएको थियो ।
कार्यसमितिले पार्वती र शिशिरलगायत कयौं राष्ट्रियस्तरका खेलाडी उत्पादन गर्न सफल प्रशिक्षक रोशन खानलाई पनि नगद १० हजारसहित सम्मानपत्र प्रदान गरेको थियो ।
सोही अवसरमा चितवनका पत्रकारद्वय अनिल मल्ल ठकुरी र होमनाथ सापकोटालाई पनि जिल्लाको तेक्वान्दो खेल विकासमा योगदान पुर्राएबापत सम्मान गरेको छ ।
उनीहरूलाई विशिष्ट अथिति रत्ननगर नगरपालिकाका नगर प्रमुख नारायण वन , प्रमुख अतिथि बाग्मती प्रदेशका संसद कृष्ण खनाल, रत्ननगर नगरपलिका खेलकुद संयोजक एवम् वडा–१० का अध्यक्ष केशब आचार्य, वडा–४ का अध्यक्ष रवीन्द्र चौधरी, नेपाल कम्युनिस्ट पार्टी रत्ननगर नगरपालिकाका इन्चार्ज केपी लामिछाने र चितवन जिल्ला तेक्वान्दो कार्यसमितिका अध्यक्ष गोपाल श्रेष्ठलगायतले सम्मान गरेका थिए ।
उक्त कार्यक्रममा जिल्ला समितिले ३४ सदस्यीय खेलाडी छनोट समेत गरेको छ । यसअघि भएको छनोट प्रतिस्पर्धाबाट पुम्सेतर्फ चार महिला र पुरुष १० पुरुष तथा फाइटमा २० पुरुष खेलाडीको छनोट गरिएको कार्यसमितिका अध्यक्ष गोपाल श्रेष्ठले जानकारी दिए ।
-1732534788.jpg)
