खेलकुदका नेताबाट कोरोनालाई चुनौती !

काठमाडौं । कोभिड–१९ (कोरोना भाईरस)ले विश्व आक्रान्त छ । संक्रमणको प्रभावबाट नेपालसमेत थलिएको छ । सयौं संख्यामा संक्रमित थपिएका छन् । कोरोना समुदाय स्तरमा फैलिसकेको छ ।

महामारीको रुपमा फैलिएको भाईरसबाट देशका हरेक क्षेत्र प्रभावित छन् । अझ ठुलो असर खेलकुद क्षेत्रमा परेको छ । प्रतिस्पर्धात्मक खेलकुदले उल्लेख्य रुपमा दर्शकको माग गर्छ । खेलाडीबीच घम्साघम्सी, दर्शकबीच पक्ष–विपक्षमा हुटिङ जस्ता कुरा खेलकुदको चरित्रनै हो ।

चार महिना बढी जस्तै भो, खेलाडी घर बाहिर निस्कन पाएका छैनन् । खेल मैदान खाली छ । खेलकुदका गतिविधि ठप्प प्राय छ । सरकारले भदौबाट अन्तराष्ट्रिय प्रतियोगिताका लागि खेलकुद प्रशिक्षण थाल्न अनुमती प्रदान गरेको छ । फुटबल र क्रिकेटले प्रशिक्षणको तयारी पनि सुरु गरेका छन् । तर बढ्दो संक्रमणले दैनिक जनजिवननै अस्त ब्यस्त बनिरहेको समय खेलकुद समेत अनिश्चित छ ।

खेलकुद गतिविधि ठप्प छन्, खेलाडी घर बाहिर निस्कन पाएका छैनन्, प्रशिक्षण र प्रतियोगिता अनिश्चित छ । खेलकुद कसरी सुरु गर्ने भनेर सरकारले भेउ पाउन सकेको छैन ।

मैदानमा खेलाडी त छैनन्, तर मैदान बाहिर खेलकुदका नेतालाई कोरोनाको डर देखिदैन । स्वागत, बधाई, बिदाई र धन्यवादका खेलकुद कार्यक्रम आयोजना भईरहेका छन् । भर्खरै राखेपमा नयाँ नियुक्तिबाट उपाध्यक्ष र सदस्य सचिव आएका छन् । केही बोर्ड सदस्य मनोनित भएका छन् ।

राखेप अन्तर्गतका खेलकुदका संघहरु नयाँ उपाध्यक्ष, सदस्य सचिव र सदस्यहरुलाई स्वागत र बधाई कार्यक्रम आयोजना गर्न तछाड मछाड लागि परेका छन् । न त उनीहरुले स्वास्थ्यको उचित सावधानी अपनाएका छन्, न त शारीरिक दुरीनै कायम राखेका छन् ।

देशभर संक्रमितको संख्या उल्लेख्य रुपमा बढेपनि खेल संघका पदाधिकारी ज्यानको बाजी थापेर राखेपका पदाधिकारीको स्वागतमा जुटेका छन् ।

डक्टर अनुप सुबेदी खेलकुदमा अनावश्यक जमघट बन्द गर्नुपर्ने सुझाव दिन्छन् ।

‘अनावश्यक भेट गर्ने कार्यक्रम गर्नु हुदैन । बरु अनलाईन भेटघाट तथा कार्यक्रम गर्न सकिन्छ । खुल्ला स्थानमा दुरी राखेर कार्यक्रम गर्न सकिन्छ । जमघट गर्दा संक्रमण फैलने डर हुन्छ ।’ उनले भने ।

गत आईतबारमात्र नेपाल भलिबल संघले सदस्य सचिव र बोर्ड सदस्यको सम्मानमा काठमाडौस्थित होटल क्राउन प्लाजामा एक कार्यक्रमको आयोजना गर्यो । मञ्चमा लहरै खेल संघका पदाधिकारीदेखि राखेपका नव नियुक्त अनुहारहरु देखिन्थे । न त उनीहरुले सामान्य मास्कनै लगाएका थिए, न त शारीरिक दुरी कायम गरेका थिए । लाग्थ्यो, मञ्चबाटै संघका पदाधिकारी र बोर्ड सदस्यहरु कोरोनालाई चुनौती दिईरहेका थिए ।

भलिबल संघ लगत्तै अखिल नेपाल फुटबल संघ एन्फाले सोमबार राखेपका नवनियुक्त उपाध्यक्ष सहित सदस्य सचिव र सदस्यलाई बधाई कार्यक्रमको आयोजना गर्यो । त्यहाँ समेत हाल उही देखिन्थ्यो । संघका सबै पदाधिकारी नवनियुक्त खेल पदाधिकारीसंग काँध जोडेर उभिएका थिए । धेरैका अनुहारमा न मास्कनै देखिन्थ्यो, न त भौतिक दुरी कायम राखेका थिए ।

कोरोनाको डरले सरकार र एन्फाले खेलाडीलाई होटल र होस्टेलमा थुनेर राखेको छ । तर पदाधिकारीमा कोरोनाको पटक्कै चिन्ता देखिदैन ।

के खेलकुदका पदाधिकारीलाई कोरोना लाग्दैन ?

एन्फाका एक पदाधिकारी फिस्स हाँसे ।

बधाई थाप्न पुगेका राखेपका नवनियुक्त उपाध्यक्ष शिव कोईराला भने कोरोनाको महामारीको समय औपचारिक कार्यक्रम गर्नु उचित नहुने बताउँछन् । उनी स्वास्थ्यलाई जोखिममा राखेर कुनै कार्यक्रम गर्न नहुने तर्क गर्छन् । तर सचेत भएर खेलकुद अघि बढाउनुको विकल्प नभएको उनी बताउँछन् ।

त्यसो भए खेलकुदका उच्च पदाधिकारीलाई सम्मान र बधाई खान किन यति हतार ?

‘कुनै कार्यक्रममा उपस्थित हुनै पर्ने बाध्यतामा मात्र एन्फा गएको हो ।’ उनी प्रष्टिकरण दिन्छन् ।