विवाद मिलाउन एन्फा प्रदेश एकको टिम केन्द्रमा

काठमाडौं । पछिल्लो समय उत्कर्षमा पुगेको अखिल नेपाल फुटबल संघ (एन्फा) भित्रको विवाद मिलाउन प्रदेश नम्बर एकको फुटबल टोली काठमाडौं आएको छ ।

अध्यक्ष कर्मा छिरिङ शेर्पा र बरिष्ठ उपाध्यक्ष पंकज बिक्रम नेम्बाङबीच बढ्दै गएको विवाद समाधान गर्न भन्दै केन्द्रका मानार्थ उपाध्यक्ष तथा प्रदेश एकका अध्यक्ष समेत रहेका किशोर राई नेतृत्वको टिम केहि दिनदेखि काठमाडौंमा छ ।

‘छलफल चलिरहेको छ । प्रयास गरिरहेका छौं । दुबै तर्फका कुरा सुनिरहेका छौं । सकारात्मक रुपमा कुरा अगाडि बढेको छ । एक अर्कालाई सहयोग गरेर जाने भन्ने कुरा छ । दुबै तर्फबाट सकारात्मक कुरा आएको छ ।’ सह–महासचिव तथा प्रदेश एकका प्रतिनिधि बसन्त अर्यालले खेलपाटीसंग भने ।

बरिष्ठ उपाध्यक्ष नेम्बाङ्ग झापा जिल्लाका प्रतिनिधि हुन् । पछिल्लो समय नेम्वाङ्गले केन्द्रिय अध्यक्ष शेर्पाबिरुद्ध फरक मत राख्दै आएका छन् । केन्द्रिय अध्यक्षसंग तिव्र मतभेद देखिएसंगै प्रदेशिक फुटबल संघले समस्या समाधानको अग्रसरता लिएको हो ।

पछिल्लो समय वरिष्ठ उपाध्यक्षले नेतृत्वविरुद्ध फरक मत राख्दै आईरहेका छन् । एक अनलाईन अन्तरवार्तामा मधेशमा सञ्चालित ग्रासरुटको बिषयमा विवादास्पद टिप्पणी गरेपछि एन्फा अध्यक्ष समस्या र विवादमा तानिएका थिए ।

सो क्रममा वरिष्ठ उपाध्यक्ष नेम्वाङ्गले अनुसन्धानका लागि अध्यक्ष शेर्पाले राजीनामा दिएर मार्ग प्रशस्त गर्नुपर्ने मत राखेका थिए । उनले अध्यक्ष शेर्पाले गरेको विवादास्पद टिप्पणीलाई लिएर फुटबलको सर्बाेच्च संस्था (फिफा) र एसियाली फुटबल महासंघ (एएफसी)मा रिपोर्ट समेत गरेका थिए । त्यसअघि समेत उनले अध्यक्ष सहित केन्द्रिय कार्यसमिति बैठकको निर्णयमा फरक मत राख्दै आएका थिए ।

नेम्वाङ्ग आफुबिरुद्ध मोर्चाबन्दीमा लागेको निष्कर्श सहित शेर्पाले वरिष्ठ उपाध्यक्षलाई ‘माईनस’ गर्ने रणनीति अख्तियार गरेका थिए । शेर्पाले यसअघि नेम्वाङ्गले नेतृत्व गरेको जिल्ला समन्वय समिति र पदपूर्ति समितिको जिम्मेवारी खोस्दै उपाध्यक्ष वीरबहादुर खड्का र उपाध्यक्ष शिक्षित पराजुलीलाई दिएका थिए । यस्तै, नेम्वाङ्गको पक्षमा उभिदै आएका केन्द्रिय सदस्य दावा लामाको फुटसल कमिटिको संयोजक रत्न श्रेष्ठलाई नियुक्त गरेका थिए ।

अध्यक्ष र वरिष्ठ उपाध्यक्षको विवाद उत्कर्षमा पुगेर वारपारकै अवस्था सिर्जना भएपछि प्रादेशिक फुटबल संघले विवाद समाधानको पहल लिएको हो ।

शेर्पा र नेम्वाङ्ग एन्फा परिवर्तन आन्दोलनका सहयात्री हुन् । दुवै जनाले नेतृत्व गरेको अभियानले मुर्तरुप लिदै दुई दशक एन्फाको नेतृत्व गरेका गणेश थापाको फुटबल विरासतलाई ढालेको थियो ।

पारदर्शीता, सुशासन र सामुहिक नेतृत्व सहित करिब दुई बर्ष अघि एन्फा कब्जा गरेका दुवै जनामा पछिल्लो समय गम्भिर मतभेद देखिएको छ । एन्फा सञ्चालनका सम्बन्धमा शेर्पासंग नेम्वाङ्ग असन्तुष्ट रहदै आएका छन् ।

परिवर्तनका शक्ति मिलेर अघि जानुपर्ने मत प्रदेश नम्बर एकले राख्दै आएको छ । शेर्पा नेतृत्वको निर्वाचित प्यानललाई कायम राख्दै फुटबल राजनीति अघि बढाउनुपर्ने रणनीति प्रदेश नम्बर एकले अपनाएको देखिन्छ ।

आफुहरुको जिम्मेवारी खोसिएसँगै पंकज र दावा एन्फा जाननै आनाकानी गर्दै आएका छन् । प्रदेश एक सहजिकरणका लागि केन्द्रमा आएपनि दुवै जना छलफलमा नहुने संकेत गरेका छन् ।

‘प्रदेश टिम आएको सुनेको छु । खोसिएको पद फिर्ता ल्याउन पहल गर्ने सुनेको छु । पदनै खोसिएपछि के बार्ता गर्नु ! छलफलमा जानुपर्छ जस्तो लाग्दैन ।’ असन्तुष्ट मध्यका एक अधिकारीले खेलपाटीसंग भने ।

प्रदेश नम्बर एकको टिम केन्द्रमा आएपनि केन्द्रिय अध्यक्ष शेर्पा भने नेम्वाङ्गको बिषयमा छलफल गर्न र बैठक बस्न अनिच्छुक रहेको सम्बद्ध स्रोत बताउँछ । एन्फाका अधिकांश पदाधिकारी कोरोना र बाढि पहिरोको कारण उपत्यका बाहिर रहेकाले एन्फा अध्यक्ष तत्काल वार्ता गर्ने मुडमा छैनन् ।

एन्फा अध्यक्ष शेर्पासंग प्रदेश अन्तर्गतका जिल्लाका विधान र कार्यक्रममा छलफल सुरु भएपनि मुख्य बिषयमा संवाद अघि बढ्न सकेको छैन ।

‘अध्यक्ष निकट अधिकांश पदाधिकारी अहिले उपत्यका बाहिर छन् । अध्यक्ष सबैलाई संगै राखेर छलफल गरौ भन्ने जस्तो कुरा गर्नुभएको छ ।’ शेर्पा निकट एक पदाधिकारीले खेलपाटीसंग भने ।

विवाद समाधानको उद्धेश्य सहित केन्द्रमा आएको प्रदेश एकको टोलीले सबैसंग सामुहिक छलफल गर्ने योजना बनाएको छ । तर उपत्यका छिरेको तीन दिन बितिसक्दा पनि सहमतीको कुनै आधार भेटिएको छैन ।

‘दुबै टिमलाई राखेर कुरा गर्छौ । त्यसपछि आगामी बाटो तय हुन्छ ।’ प्रदेश एक प्रतिनिधि अर्यालले भने ।

एन्फा विवादमा वरिष्ठ उपाध्यक्ष एक्लो जस्तै देखिएपछि प्रदेश एकले कार्यसमितिको बैठक आह्वान गर्दै मध्यमार्गी प्रस्ताव अघि बढाएको थियो ।

बैठकले वरिष्ठ उपाध्यक्ष र सदस्य लामाको पद खोसिएकोमा गम्भिर ध्यानकर्षण भएको जनाउँदै विवाद समाधानका लागि केन्द्रिय नेतृत्वसंग पहल गर्न काठमाडौं जाने औपचारिक निर्णय गरेको थियो ।