काठमाडौं । युवा तथा खेलकुद मन्त्रालयले भक्तबहादुर ढकालको नेतृत्वमा ७ सदस्यीय नियमावली मस्यौदा समिति गठन गरेको छ ।
खेलकुद विकास ऐन २०७७ कार्यान्वनयमा आएसंगै मन्त्रालयले ढकालको नेतृत्वमा नियमावली मस्यौदा समिति गठन गरेको हो ।
ऐनले तोकिएको बिषय नियमावलीले स्पष्ट बनाउन समिति गठन गरिएको हो । समितिलाई ३० दिनभित्र खेलकुद विकास ऐन २०७७ को नियमावली बनाउन कार्यादेश दिईएको छ ।
मन्त्रीस्तरीय निर्णयबाट गठित समितिले विभिन्न सरोकारवाला निकायसंग छलफल गरि ऐनको नियमावली निर्माण गर्नेछ ।
राष्ट्रिपति विद्यादेवी भण्डारीबाट असार ११ गते प्रमाणीकरण भएको विधेयक सात दिनपछि कार्यान्वयनमा आएको थियो ।
'समिति गठनसंगै नियमावली बनाउने कामको थालनी भएको छ । समितिलाई ३० भित्र नियमावली बनाउन प्रारम्भिक समय उपलब्ध गराएका छौ ।' युवा तथा खेलकुद मन्त्रालयका प्रवक्ता मानबहादुर बिकेले खेलपाटीसंग भने ।
मन्त्रालयले खेलकुद विभाग महाशाखा प्रमुखको ढकालको नेतृत्वमा समिति गठन गरेको हो । समितिमा मन्त्रालयकै कानुनी शाखा प्रमुख सिम्जा डंगोल, प्रशासन शाखा प्रमुख सागर रोका र आर्थिक प्रशासन शाखा प्रमुख नवराज घिमिरे रहेका छन् ।
समितिमा राष्ट्रिय खेलकुद परिषद् (राखेप)को प्रतिनिधिको रुपमा नारायणराज अर्याल, कानुन न्याय तथा संसदीय मामिला मन्त्रालयका प्रतिनिधि र एक बिज्ञ सदस्यलाई मनोनित गरिनेछ ।
समितिले विभिन्न सरोकारवाला निकायसंग छलफल गरि ऐनमा उल्लेख भए अनुसारको नियमावली बनाउनेछ ।
