काठमाडौं । महामारीको रुपमा फैलिएको कोभिड–१९ का कारण राष्ट्रिय खेलकुद संघहरुको निर्वाचन प्रभावित बनेको छ । राष्ट्रिय खेलकुद परिषद् (राखेप)मा दर्ता भएर चल्तीमा रहेका संघहरुले कोरोनाकै कारण नयाँ नेतृत्वको निर्वाचन गर्न पाएका छैनन् ।
परिषद्बाट नयाँ नेतृत्वको निर्वाचनका लागि स्वीकृती लिएका आर्चरी र मान्दोकाई कराँते संघले कोरोनाकै कारण साधारण सभा गर्न सकेका छैनन् ।
दुवै संघले राखेपबाट साधारण सभा आयोजनाका लागि अनुमती प्राप्त गरेका थिए । तर कोरोना संक्रमण डर र सरकारले लागू गरेको लकडाउनका कारण दुवै संघले निर्वाचन प्रक्रिया अघि बढाउन सकेका छैनन् ।
राखेपका अनुसार आर्चरी र मान्दोकाई कराँते सहित नेपाल सुटिङ संघ, नेपाल जुडो संघ, अखिल नेपाल टेबल टेनिस संघ र नेपाल भलिबल संघले समेत कोरोनाकै कारण नयाँ नेतृत्वको निर्वाचन गरेका छैनन् ।
राखेपले प्रक्रिया नपुगेको भन्दै कतिपय संघलाई निर्वाचनको अनुमती दिएको छैन ।
‘स्वीकृती लिएका दुई वटा संघले लकडाउनका कारण साधारण सभा रोकिएको बताएका छन् । तर नयाँ ऐन अनुसार प्रक्रिया पुरा नगरेका संघहरुलाई मान्यता दिएका छैनौ । ’ संघ संस्था समन्वय शाखा प्रमुख ज्ञानेन्द्र श्रेष्ठले खेलपाटीसंग भने ।
कोरोनाकै कहरका बीच संघीय संसदको राष्ट्रिय सभाले खेलकुद विधास ऐन २०७७ पारित गरेको थियो । राष्ट्रपतिबाट प्रमाणीकरण भएको ऐन असार १७ गतेबाट कार्यान्वयनमा समेत आएको छ ।
संघ संस्था समन्वय शाखा प्रमुख श्रेष्ठका अनुसार नयाँ ऐन अनुसार प्रक्रिया पुरा गरेका संघहरुले मात्र नयाँ निर्वाचनका लागि अनुमती प्राप्त गर्नेछन् ।
‘नयाँ ऐन कार्यान्वयनमा आएको छ । सोही अनुसार संघहरुले प्रक्रिया पुरा गर्न आवश्यक छ । कागजात पुरा गरेका संघहरुले मात्र नयाँ निर्वाचनको अनुमती पाउनेछन् ।’ उनले भने ।
कोरोना कहरका कारण घरेलु खेलकुदका गतिविधि ठप्प छन् । सरकारले रंगशाला सहित खेलाडी, दर्शक जमघट हुने स्थानमा लकडाउन यथावत राख्ने निर्णय गरेको छ ।
सरकारले औपचारिक रुपमा अनुमती प्रदान नगरेपनि ब्याटमिन्टनका खेलाडीले परिषद्को कभर्डहलमा सामान्य अभ्यास सुरु गरेका छन् । तर धेरै संघहरु खेलाडीको अभ्यास सत्र अघि बढाउन सरकारको निर्देशन पर्खिएर बसेका छन् ।
कोरोना कारण मैदान, कोर्टभित्रका खेलकुद गतिविधिसंगै राष्ट्रिय खेलकुद संघको निर्वाचन प्रक्रिया समेत प्रभावित बनेको हो ।
नेपाल जुडो संघका अध्यक्ष दिपकहर्ष बज्राचार्यले लकडाउन र कोरोनाका कारण निर्वाचन प्रक्रिया अघि बढाउन नसकेको खेलपाटीलाई बताए ।
‘लकडाउनले बाहिर जान नमिल्ने अवस्था छ । परिषद्संगको सल्लाह अनुसार अघि बढ्छौ ।’ बज्राचार्यले खेलपाटीसंग भने ।
जुडो संघको चार बर्षे कार्यकाल गत माघमा सकिएको थियो । राखेपले तीन महिनाभित्र निर्वाचन गराउन संघलाई पत्राचार समेत गरेको थियो । तर कोरोनाकै कारण देखाउँदै संघले साधारण सभा आयोजना गर्न सकेको छैन ।
‘नयाँ ऐन जारी भएको छ । नयाँ व्यवस्था अनुसार निर्वाचन गर्नुपर्ने देखिएको छ । अवस्था सामान्य भएपछि संघको निर्वाचन प्रक्रिया अघि बढ्छ ।’ उनले भने ।
