एन्फाविरुद्ध अदालतमा अवहेलनाको मुद्दा

काठमाडौं । अदालतको अवहेलना गरेको भन्दै अखिल नेपाल फुटबल संघ (एन्फा) विरुद्ध सर्वोच्च अदालतमा मुद्दा दर्ता भएको छ ।

अधिवक्ता सुजित केसीले सोमबार एन्फासहित अध्यक्ष कर्मा छिरिङ शेर्पा र प्रवक्ता किरण राई गरी तीनलाई विपक्षी बनाउँदै मुद्दा दर्ता गराएका हुन् ।

रौतहटको महिला फुटबल एकेडेमी गैरकानुनी रुपमा निर्माण गरिएको र त्यस मुद्दा विचाराधीन अवस्थामा रहेपनि एन्फा र पदाधिकारीले अदालतको आदेशलाई अवहेलना गरेको कारण मुद्दा दर्ता गरिएको केसीले खेलपाटीलाई बताए । 

'हालसम्म पनि सम्मानित अदालतमा मुद्दा विचाराधिन अवस्थामा नै रहेको छ । यसरी अन्तरिम आदेशको सम्बन्ध छलफल नभएको र अन्तरिम आदेश कायम नै रहेको अवस्था अदालतको आदेशको मर्म र भावना विपरित गई विपक्षीले कार्य गरेकोले यस सम्मानित अदालतको अपहेलना भएको छ,' सर्वोच्चमा दर्ता गरिएको निवेदनमा भनिएको छ।

यस अघि केसीले माघ २१ गते रौतहटको सरकारी जग्गा कब्जा गरेर महिला फुटबल एकेडेमी बनाएको भन्दै सर्वोच्च अदालतमा रिट दायर गरेका थिए । 

त्यसपछि माघ २९ गते एकेडेमीका सम्बन्धमा भए गरेका निर्णयहरु कार्यान्वयन नगर्नु-नगराउनु यथास्थितिमा राख्नु भनी सर्वोच्चले अन्तरिम आदेश जारी गरेको थियो ।

तर, एन्फाको गत माघ २६ गते बसेको कार्यसमितिको बैठकले एकेडेमीको सम्बन्धमा थप निर्णय गर्नु सर्वोच्च अदालतको आदेश विरुद्ध भएको निवेदनमा उल्लेख गरिएको छ ।

एन्फाको त्यस बैठकले एकेडेमीबारे ३ निर्णय गरेको थियो । जसमा निर्माण सम्पन्नको प्रमाणपत्र बुझाएकोले त्यसलाई स्वीकृत गर्ने, ३९ लाख ५७ हजार १ सय १७ रुपैँया घेरा बार र गार्ड हाउस निर्माण तथा ४५ लाख ९७ हजार ७ सय १ रुपैँयामा फ्लोरिसिङको काम पनि टेक प्रालिलाई नै ठेक्का दिने अर्को निर्णय गरेको छ ।

त्यस्तै सो बैठकले सो एकेडेमीमा ५७ लाख ८६ हजार ८ सय ३ रुपैयाँ लागतमा फर्निसिङका लागि भनि नयाँ टेन्डर आह्वान गर्ने निर्णय समेत गरेको थियो ।