महानगरको अनुदान ए डिभिजन क्लबले भोलि पाउने

काठमाडौं । काठमाडौं महानगरपालिकाले प्रत्येक बर्ष ए डिभिजन क्लबलाई उपलब्ध गराउदै आएको अनुदान रकम भोलि (सोमबार) वितरण गर्ने भएकाे छ ।

महानगरले आफ्नो क्षेत्रभित्रका ए डिभिजन क्लबलाई बार्षिक १० लाख उपलब्ध गराउदै आएको छ । सोही अनुसार महानगरले यस बर्ष समेत ए डिभिजनका ६ क्लबलाई अनुदान रकम उपलब्ध गराउन लागेको हो ।

महानगरकी सामाजिक विकास विभाग महाशाखा प्रमुख विमला कोईरालाले कोरोनाका कारण प्रभावित बनेको अनुदान वितरण साेमबार हुने खेलपाटीलाई बताईन् ।

‘तीन महिना अघि निर्णय भएपनि कोरोनाको करणले अनुदान वितरण गर्न सकेका थिएनौ । मंगलबार सामान्य कार्यक्रम आयोजना गरेर अनुदान वापतको रकम वितरण गर्न लागेका छौ ।’ उनले भनिन् ।

अनुदान रकम ए डिभिजन लिगको च्याम्पियन मछिन्द्र क्लब, संकटा, हिमालयन शेर्पा, मनाङ मस्र्याङ्दी, काठमाडौं खेल मण्डल र सरस्वती युथ क्लबले प्राप्त गर्नेछन् ।

काठमाडौं महानगरपालिकाले आफ्नो भुगोललाई फुटबलको माध्यमबाट प्रतिनिधित्व गर्ने ए, बी र सी डिभिजन क्लबलाई बार्षिक अनुदान उपलब्ध गराउदै आएको छ ।

महानगरले ए डिभिजन क्लबलाई १० लाख, बीलाई ३ लाख र सी डिभिजन क्लबलाई २ लाख रुपैयाँ अनुदार वितरण गर्दै आएको छ ।

काठमाडौं महानगरले नगरको नीति तथा कार्यक्रममै राखेर क्लबलाई अनुदान रकम बितरण गर्दै आएको छ । महानगरको अनुदान रकम लिए वापत क्लबहरुले महानगरको लोगो क्लबको जर्सीमा लगाउनेछन् ।

महानगर भित्रका क्लबलाई आर्थिक रुपमा सहयोग पुर्याउने उद्धेश्यले काठमाडौं महानगरले विभिन्न श्रेणीका क्लबलाई आर्थिक अनुदान वितरण गर्न थालेको हो ।

यस बर्ष कोरोनाका कारण कार्यक्रम प्रभावित बनेपछि बी र सी डिभिजन क्लबले अर्को बर्ष रकम प्राप्त गर्नेछन् ।

‘कोरोनाले बी र सी डिभिजनका क्लबलाई निर्णय गरेर अनुदान बाँड्न सकिएन । यस आर्थिक बर्षको रकम सहित अर्को बर्ष क्लबले अनुदान पाउनेछन् ।’ कोईरालाले भनिन् ।