पोखरा । कास्की जिल्ला फुटबल संघमाथि लागेको आर्थिक अनियमितता छानबिन गर्न गठिन समितिले प्रतियोगिताको हिसाब किताबमा केन्द्रित रहेर अनुसन्धान सुरु गरेको छ ।
अखिल नेपाल फुटबल संघ (एन्फा)ले जिल्ला फुटबल संघ कास्कीको अनुसन्धानका लागि गठित समितिले जिल्ला संघले सञ्चालन गरेका ६ वटा प्रतियोगिताको आर्थिक कारबारमा केन्द्रित रहेर अनुसन्धान अघि बढाएको हो ।
एन्फाले उपाध्यक्ष वीरबहादुर खड्का संयोजकत्वको समितिलाई कास्की जिल्ला फुटबल संघमा देखिएको आर्थिक अनियमितता आरोपमाथि अनुसन्धान गर्न अख्तियारी दिएको थियो ।
यसअघि सदस्य रत्नबहादुर श्रेष्ठलाई छानबिनको जिम्मेवारी दिएपनि स्वास्थ्यको कारण देखाउँदै उनले राजीनामा दिएका थिए ।
छानबिन कमिटिले माग गरेका अनुसारको ६ वटा प्रतियोगिताको कागजात जिल्ला फुटबल संघले बुझाएको छ । कास्की जिल्ला फुटबल संघले २०७५ सालबाट आयोजना भएका प्रतियोगिताको बिल भरपाई छानबिन समितिलाई बुझाएको हो ।
समितिका संयोजक खड्काले माग अनुसारको कागजात आफुले प्राप्त गरेको र त्यसको अध्ययन गरिरहेको बताएका छन् ।
‘प्रतियोगिताको कागजात माग गरेका थियौँ र प्राप्त पनि गरेका छौ । अहिले अध्ययनको चरणमा रहेका छौँ ।’ खड्काले भने ।
छानबिन समितिले बुधबार कास्की जिल्ला फुटबल संघसंग २०७५ बाट आयोजना गरेका प्रतियोगताकोे कागज पत्र माग गरेको थियो ।
प्रतियोगिता सञ्चालन गर्दाको कागज पत्र तथा बिल भरपाईको माग गर्दै समितिले कास्की जिल्ला फुटबल संघका नाममा पत्र काटेको थियो ।
जिल्ला फुटबल संघले २०७५ मा आयोजना गरिएको मनकामना कप, जिल्ला लिग, जिल्ला स्तरीय अन्तर विद्यालय फुटबल प्रतियोगिता, प्रदेश स्तरीय अन्तर विद्यालय फुटबल प्रतियोगिता तथा पुरुष र महिलाको अन्तर विद्यालय फुटबल प्रतियोगिताको कागजात बुझाएको थियो ।
कास्की जिल्ला फुटबल संघमाथि आर्थिक अनियमितताको गम्भिर आरोप लागेपछि एन्फाले केन्द्रिय स्तरको छानबिन समिति गठन गरेको थियो ।
समितिमा खड्कासँगै आनन्द रंजित र नारायण अधिकारी सदस्य रहेका छन् ।
छानबिनका लागि गत मंगलबार पोखरा आएको टोलीले लगत्तै अनुसन्धान सुरु गरेको हो । समितिले गरेको छानबिन र निष्कर्शका आधारमा एन्फाले जिल्ला फुटबल संघमाथि आवश्यक कारबाही प्रक्रिया अघि बढाउने बताएको छ ।
