काठमाडौं । मंगलबार रमेश रायमाझीलाई अखिल नेपाल फुटबल संघ (एन्फा)ले लिग कमिटिको सह–संयोजकको जिम्मेवारी प्रदान गर्यो ।
करिब दुई बर्ष एन्फा बाहिर रहेका रमेश औपचारिक रुपमा पुन एन्फा फर्किए । उनी एन्फा फर्कने निर्णयले धेरैलाई अचम्मित बनायो ।
फुटबलमा रायमाझीलाई दुई कारणले चिनिन्छन् ।
पहिलो कुरा उनी फुटबलमा खटेर काम गर्ने मानिन्छन् । दिएको जिम्मेवारी पुरा मेहनतका साथ निभाउँछन् । काममा समय दिन्छन् । फुटबलप्रति लगाब छ, मेहनत गर्छन् । उनीसंग काम गरेकोहरु यस्तै भन्छन् ।
‘उनी खट्न सक्ने मान्छे हुन् । उनी दिएको जिम्मेवारी पुरै शक्तिका लगाएर सक्न कोशिश गर्छन् । एन्फालाई यस्तै मान्छे चाहिएको छ ।’ रायमाझीको एन्फा प्रवेशसंगै फुटबलका एक पदाधिकारीले खेलपाटीसंग भने ।
हौसियर खट्ने स्वभावका रायमाझीले करिब दुई बर्ष राष्ट्रिय फुटबल टिमको ब्यवस्थापक भएर काम गरे ।
उनी आफैपनि एन्फा प्रवेशले दंग छन् ।
‘घर फर्किए जस्तो भएको छ ।’ एन्फा प्रवेशबारे खेलपाटीको प्रश्नमा रायमाझीले भने ।
‘लिग कमिटिको सह–संयोजकको जिम्मेवारी पाएको छु । लिगको स्तर घटेको देखिन्छ । त्यसलाई बलियो बनाउन सकिन्छ भनेर जिम्मेवारी मागेरै कमिटिमा गएको हुँ ।’ उनले प्रष्टसंग भने ।
उनले एन्फा प्रवेश गर्दा आफुलाई गर्वको महशुश भएको बताए ।
दोस्रो चर्चाकाे बिषय उनी एन्फाका पूर्व अध्यक्ष गणेश थापाका नजिकका पात्र हुन् (थिए) । एन्फासंग पूर्व अध्यक्ष थापाको दुरी बढिरहेको समय रायमाझी जिम्मेवारी सहित एन्फा छिरेका हुन् । सोही कारण उनको एन्फा प्रवेशको निर्णयले धेरैलाई अचम्मित बनायो ।
‘कसैको पक्ष लागेर गएको हैन । संस्थालाई जोगाउनुपर्छ भनेर गएको हो ।’ उनले भने, ‘संस्थालाई बलियो बनाउनुपछ भन्ने लाग्छ ।’
चुनावको समय कुनै एक पक्षमा लागेको हुन सक्ने बताउँदै उनले फुटबल विकासका लागि सबै एक ठाउँमा हुन आवश्यक रहेको बताए ।
‘चुनावमा कसैको पक्ष लागेको हुला, भोलि फेरी त्यो दिन आउँला । तर अहिले चुनावी माहोल छैन । फुटबल विकास गर्न एक ठाउँ हुने हो ।’ उनी भन्छन् ।
फुटबलमा प्रष्ट दुई धार छ । एक धार गणेश थापाको समर्थन गर्छ, अर्को धारले एन्फा चलाईरहेको छ । पछिल्लो समय दुवै पक्ष एक अर्कालाई प्रहार गर्न सक्दो कोशिश गरिरहेका छन् । सबैले रायमाझीलाई थापा पक्षिय रुपमा चिन्छन् । उनी कसरी एन्फा छिरे त ?
रायमाझी भने अहिले आफु दुवै धारमा नरहेको बताउँछन् ।
‘दुई धार होला । तर म मध्यमार्गी धार हो । दुवैलाई मिलाएर फुटबल विकास गर्न पर्छ भन्ने मान्यता बोक्छु ।’ रायमाझी भन्छन्, ‘करिब १२ बर्ष पूर्व अध्यक्ष थापासंग एन्फामा काम गरियो । स्कुलिङ उहाँकै हो । मिलेरै जानपर्छ भनेर एन्फा प्रवेश गरेको हुँ । फुटबललाई एकताबद्ध गर्न मेरो भुमिका रहन्छ ।’
