रमेश सुबेदी, हिम बिक्रम केसी ।
काठमाडौं । म्याच फिक्सिङको आरोपमा 'ए' डिभिजन क्लब सरस्वतीका कप्तान दिपेश श्रेष्ठ र हिमालयन शेर्पाका गोलरक्षक किशोर गिरीमाथि अनुसन्धान सुरु भएको छ ।
घरेलु फुटबलको शीर्ष डिभिजनको लिगको ५९ औं खेल फिक्सिङ गरेको आरोपमा सरस्वतीका कप्तान श्रेष्ठ र हिमालयन शेर्पाका गोलरक्षक गिरीमाथि अनुसन्धान अघि बढाउँदै लिग अवधिभरका लागि प्रतिबन्ध लगाउने तयारी भएको छ ।
अनुसन्धान पुरा भएपछि दुवै खेलाडीमाथि थप निर्णय लिने अखिल नेपाल फुटबल संघ एन्फाको तयारी छ ।
‘सरस्वतीको कप्तानले शेर्पाका गोलरक्षकलाई प्रस्ताव गरेको खुल्न आएको छ । लेनदेन भएको देखिएको छैन । थप अनुसन्धान गर्दै तत्काल लिग खेल्न नपाउने गरि अनुसन्धान अघि बढेको छ ।’ एन्फा स्रोतले खेलपाटीलाई भन्यो ।
अनुसन्धानमा सरस्वतीका कप्तानले प्रष्टसंग फिक्सिङको प्रस्ताव गोलकिपरलाई गरेको खुलेको छ । तर सरस्वतीका कप्तानले मजाकमा सो प्रस्ताव राखिएको बताएका छन् । तर अनुसन्धानमा संलग्न टोली कप्तानको जवाफबाट सन्तुष्ट छैन । सोही कारण उनलाई तत्कालन तीन खेलको प्रतिबन्ध लगाउन प्रस्ताव गरिएको छ ।
घटनालाई लिएर एन्फाको ईन्टिग्रिटी अफिसर सहितको टोलीले खेलमा संलग्न खेलाडीमाथि प्रारम्भिक सोधपुछ गरेको छ ।
माघ १४ गते एन्फा कम्प्लेक्स सातदोबाटोमा हिमालयन शेर्पा क्लब र सरस्वती युथ क्लब भिडेका थिए । सो खेलमा सरस्वतीले शेर्पालाई ४–३ ले हराउँदै लिगमा पहिलो जित दर्ता गरेको थियो ।
सो खेल अघि लिगमा मात्र एक गोल गरेको सरस्वतीले शेर्पालाई फराकिलो अन्तरले पराजित गरेको थियो । सरस्वतीसंग हार्नु अघि शेर्पा क्लबले लिगकै बलियो टोली मछिन्द्रलाई २–० ले स्तब्ध बनाएको थियो ।
सरस्वती र शेर्पाको नाटकीय नतिजासंगै सो खेल फिक्सिङको संकाको घेरामा परेको थियो ।
सो खेलबारे खेलपाटीले दर्शकलाई पनि थाहा हुन्छ – अब गोल हुँदैछ भनेर स्टोरी प्रकाशित गरेको थियो । स्टोरी लगत्तै सो खेलको अनुसन्धान गर्नुपर्ने माग चौतर्फी रुपमा उठेको थियो ।
एन्फाले लिग र अन्य प्रतियोगितामा हुन सक्ने म्याच फिक्सिङको अनुसन्धान गर्न ईन्टिग्रिटी अफिसर र अनुशासन कमिटि राखेको छ ।
खेल मिलोमतोको आरोप लागेका शेर्पाका गोलरक्षक गिरी र सरस्वतीका कप्तान श्रेष्ठले लिगका बाँकी तीन खेल गुमाउने छन् ।
कारबाही अघि शेर्पा र सरस्वतीका दुवै खेलाडीले एक–एक खेल खेलिसकेका छन् । शेर्पा क्लब लिगको उपविजेता संकटासँग १–० ले पराजित भएको थियो । सरस्वती भने थ्री स्टारसँग ४–० ले पराजित भएको थियो ।
अनुसन्धानसंगै सरस्वतीका कप्तान दिपेश श्रेष्ठ हाल टिमको अभ्यासमा पनि उपलब्ध छैनन् ।
सरस्वतीका प्रशिक्षक प्रदिप नेपाल आफ्नो खेलाडी कारबाहिमा परेको भन्ने बिषय आफुलाई थाहा नभएको बताउँछन् ।
‘दिपेश अभ्यासमा नआएको केहि दिन त भयो । किन हो त्यो भने थाहा पाएको छैन ।’ उनी भन्छन् ।
सरस्वती क्लबका अध्यक्ष शिक्षित पराजुलीले आफ्नो खेलाडीको कारबाही र मिलेमतोको विषयमा क्लबलाई कुनै आधिकारीक जानकारी नआएको बताउँछन् ।
‘इन्टिग्रिटी अफिसरले कप्तान सहित केहि खेलाडीलाई बोलाएका रहेछन् । तर यहि भन्न सक्ने अवस्था छैन । आधिकारीक पत्र आएको छैन ।’ एन्फाका उपाध्यक्ष समेत रहेका पराजुली भन्छन् ।
शेर्पाका प्रशिक्षक सञ्जिब बुढाथोकी आफ्नो गोलरक्षकको कारबाहिको बिषयमा कुनै जानकारी नभएको बताउँछन् ।
‘सबै अभ्यास गएर भर्खरै फर्किएका हौं । कारबाहिको बारेमा केही थाहा छैन ।’ उनी भन्छन् ।
एपीएफका प्रशिक्षक राजेन्द्र तामाङले आफ्नो टिमलाई रेलिगेशनमा पार्न सरस्वती र शेर्पा क्लब मिलेको आरोप लगाउँदै आएका छन् ।
