पुलिस र एपीएफ समूह विजेता

काठमाडौं । विभागीय टिम नेपाल पुलिस क्लब र एपीएफ क्लब राजधानीमा जारी पाँचौ संकरणको आरबीबी एनभीए राष्ट्रिय महिला-पुरुष क्लब भलिबल च्याम्पियनसिपको पुरुषतर्फ समूह विजेता बन्दै क्वाटरफाइनलमा प्रवेश गरेका छन् ।

त्रिपुरेश्वरस्थित राखेप कभर्ड हलमा मंगलबार भएको समूह चरणको अन्तिम खेलमा मणिमुकुन्द भलिबल क्लबलाई ३-० सेटमा पराजित गर्दै पुलिस समूह 'सी' को विजेता बनेको हो ।

पुलिसले मणिमुकुन्दमाथि २५-१४, २५-२० र २५-१४ को सेटमा जित निकाल्यो । जितसँगै समूह 'सी' को पुलिसले २ खेलमा ६ अंक जोड्यो । पहिलो खेलमा पुलिसले पार्वती भलिबल क्लबबाट वाक ओभर पाएको थियो ।

मणिमुकुन्द समूह उपविजेता बन्दै अन्तिम आठमा पुग्न सफल भयो । मणिमुकुन्दले २ खेलमा ३ अंक जोड्यो ।

पुरुषतर्फ नै मंगलबार एपीएफले जावलाखेल भलिबल केन्द्रलाई ३-० को सेटमा हरायो । एपीएफले जावलाखेललाई २५-१४, २५-१० र २५-९ ले पाखा लगायो ।

जितसँगै समूह 'बी' को विजेता बन्ने क्रममा एपीएफले ३ खेलमा ६ अंक जोड्यो । पहिलो खेलमा एपीएफले बुलबुले रारा क्लबलाई हराएको थियो ।

यस समूहबाट बुलबुले रारा उपविजेता बन्दै क्वाटरफाइनलमा पुग्यो । बुलबुलेले दोस्रो खेलमा जावलाखेललाई हराएको थियो । बुलबुलेले २ खेलमा ३ अंक जोड्यो ।

समूह 'ए' बाट त्रिभुवन आर्मी क्लब विजेता र नयाँबजार सामाजिक युवा क्लब उपविजेता तथा समूह 'डी' बाट हेल्प नेपाल स्पोर्टस क्लब विजेता र बुद्धटोल युवा भलिबल क्लब उपविजेता बन्दै यस अघि नै अन्तिम आठमा पुगिसकेका छन् ।

मंगलबारको दुई खेलसँगै पुरुषतर्फको क्वाटरफाइनल समिकरण समेत पुरा भएको छ ।

अब क्वाटरफाइनलमा आर्मीले मणिमुकुन्दसँग प्रतिस्पर्धा गर्दा पुलिसले नयाँ बजारसँग खेल्नेछ । त्यस्तै एपीएफले बुद्धटोलसँग खेल्दा हेल्प नेपालले बुलबुलेसँग खेल्नेछ ।

नेपाल भलिबल संघले आयोजना गरेको प्रतियोगिताको महिला र पुरुष दुवैको विजेताले २ लाख पुरस्कार पाउने छन् । यस्तो दोस्रोले १ लाख र तेस्रोले ५० हजार पाउने छन् ।

महिला र पुरुषको सर्वोकृष्ट खेलाडीले २५/२५ हजार पाउने छन् । यस्तै उत्कृष्ट स्पाइकर, लिब्रो, सरभर,बल्कर, लिफ्टर र प्रशिक्षकले जनही १०/१० हजार पाउने छन् ।