एपीएफ र आर्मी सेमिफाइनलमा

काठमाडौं । साविक विजेता एपीएफ क्लब र त्रिभुवन आर्मी क्लब राजधानीमा जारी पाँचौ संकरणको आरबीबी एनभीए राष्ट्रिय महिला-पुरुष क्लब भलिबल च्याम्पियनसिपको महिलातर्फ सेमिफाइनलमा प्रवेश गरेका छन् ।

त्रिपुरेश्वरस्थित राखेप कभर्ड हलमा आइतबार भरतपुर मेट्रो खेलकुद परिषदलाई ३-० को सेटमा पराजित गर्दै एपीएफले लगातार दोस्रो जितसहित अन्तिम चारको यात्रा तय गरेको हो ।

लगातार दोस्रो जित निकाल्ने क्रममा एपीएफले भरतपुरलाई २५-११, २५-१२ र २५-१० ले पराजित गर्यो ।

जितसँगै समूह 'ए' को एपीएफले २ खेलमा ६ अंक जोडेको छ । पहिलो खेलमा एपीएफले जावलाखेल भलिबल प्रशिक्षण केन्द्रलाई हराएको थियो ।

आइतबार भएको दोस्रो खेलमा आर्मीले जावलाखेल भलिबल प्रशिक्षण केन्द्रलाई ३-० को सेटमा हराएर लगातार दोस्रो जितसहित सेमिफाइनलमा स्थान बनाएको हो ।

आर्मीले जावलाखेललाई २५-११, २५-५ र २५-१३ ले पराजित गर्यो । जितसँगै समूह 'ए' को आर्मीले पनि २ खेलमा ६ अंक जोड्यो । पहिलो खेलमा आर्मीले भरतपुरलाई हराएको थियो ।

अब समूहको समूह विजेता र उपविजेता भने एपीएफ र आर्मीबीचको खेलले तय गर्नेछ ।

यस समूहमा लगातार दुई हार व्यहोरेको भरतपुर र जावलाखेल भने बाहिरिएका छन् ।

नेपाल भलिबल संघले आयोजना गरेको प्रतियोगिताको पुरुषतर्फ १० टिमको सहभागिता रहेको छ । महिलातर्फ ७ टिमको सहभागिता रहेको छ ।

माघ १० गतेसम्म चल्ने प्रतियोगिताको महिला र पुरुष दुवैको विजेताले २ लाख पुरस्कार पाउने छन् । यस्तो दोस्रोले १ लाख र तेस्रोले ५० हजार पाउने छन् ।

महिला र पुरुषको सर्वोकृष्ट खेलाडीले २५/२५ हजार पाउने छन् । यस्तै उत्कृष्ट स्पाइकर, लिब्रो, सरभर,बल्कर, लिफ्टर र प्रशिक्षकले जनही १०/१० हजार पाउने छन् ।