काठमाडौं । रविन श्रेष्ठ घरेलु फुटबलले पाएका अब्बल दर्जाका डिफेन्डर हुन् ।
सन् २०१३ को साफ च्याम्पियनसिपमा रविन सबै दर्शक, समर्थकको मन मष्तिस्कमा बस्न पुगेका थिए ।
डिफेन्स लाईनबाट बल अघि बढाउँदै ‘थर्ड जोन’मा रविनले निकालेको क्रसमा जुमानु राईले गोल गरेका थिए ।
गोल सहजै निस्कियो ।
तर डिफेन्सबाट बल अगाडी बढाएर रविनले जसरी क्रस गरे, त्यो मुभ निकै लोभलाग्दो थियो । उत्तिकै स्मरणीय पनि ।
त्यही गोलमा नेपालले भारतलाई पराजित गरेको थियो । रविनले घरेलु फुटबलमा आफुलाई प्रमाणित गर्ने अवसर पाएका थिए ।
पातलो ज्यान, होचो कदका रविनले आफुलाई घरेलु फुटबलमा अब्बल दर्जाको डिफेन्डरको रुपमा पुष्टि पनि गरे ।
उनै रविन फुटबलबाट करिब डेढ बर्ष टाढै रहे ।
पुलिस क्लबका जागिरे रविनको दायाँ खुट्टाको लिगामेन्ट गएपछि फुटबल गतिविधि ठप्प जस्तै रह्यो ।
उनी चोटबाट निको हुँदै सन् २०१७ मा मैदान फर्किए । तर सोही चोटले पिरोल्न थाल्यो ।
झण्डै डेढ बर्षपछि रविन पुलिसको जर्सीमा घरेलु फुटबलमा पुनरागमन गर्दैछन्, पुरै तयारीका साथ ।
प्रशिक्षकले विश्वास गरेमा शुक्रबार उनी पुलिसको जर्सीमा देखिनेछन् ।
‘लिगको लागि भनेर तयारी गरिहेको छु । राम्रो भईरहेको छ । प्रशिक्षकले चाहेको अवस्थामा खेल्न तयार छु ।’ रविन भनेका छन् ।
अर्को महिना रविनले खुट्टाको शल्यक्रिया गरेको एक बर्ष पुग्दैछ । त्यसपछि उनको फुटबल गतिविधि ठप्प जस्तै रह्यो । गत सिजन उनले लिग खेल्नै पाएनन् । पुलिसले छैठौ स्थानमा रहेर लिगको अन्त्य गरेको थियो ।
सन् २००८ बाट राष्ट्रिय टिममा डेब्यु गरेका लेफ्ट ब्याक रविन सन् २०१७ एएफसी एसिया कप छनोट अन्तर्गत फिलिपिन्ससँगको अवे खेलका क्रममा घाईते हुन पुगेका थिए ।
नेपाल एएफसी सोलिडारीटी कप जितेका कारण छनोट चरण खेल्न पाएको थियो । तर प्रतियोगिताको पहिलो खेलमै उनी घाईते भए ।
९ महिनाको विश्रामपछि पुनः उनी मैदान फर्किएका थिए ।
बंगलादेशको राजधानी ढाकामा हुने साफ खेल्ने अन्तिम सूचिमा उनको नाम समावेश गरिएकाे थियो ।
साफकै तयारी लागि उनी सहितको टिम थाईल्याण्डको यू–२३ टिमसँग मैत्रिपुर्ण खेल खेल्न बैंकक लागेको थियो । अभ्यासको क्रममा रविनकाे चोट बल्झिन पुग्याे । उनी पुन मैदान बाहिर रहन पुगे ।
रविनको चोट पुन निको भएको छ । र उनी चालू लिगमार्फत घरेलु फुटबलमा पुनरागमन गर्दैछन् ।
उनी लिगमा प्रर्दशनलाई सम्झना योग्य बनाउन चाहन्छन् । दैनिक पुलिसको खेल हेर्न मैदान पुग्ने रविन भने खेल्ने बिषयमा धेरै नसोचेको बताउँछन् ।
‘सामान्य सोचेको छु । पहिले जस्तो खेलेको हो, त्यस्तै खेल्ने हो । आत्मविश्वास तल माथि भएको छैन । डेढ बर्षपछि मैदान फर्कदा असहज त भैहाल्छ ।
तर तयारी अनुसार गाह्रो नहोला’ । उनी भन्छन् ।
रविनलाई मैदान उतार्ने विषयमा पुलिसका प्रशिक्षक अनन्त राज थापा सकारात्मक छन् । रविन पुर्ण रुपमा फिट हुँदै गएका कारण उनी मैदानमा उत्रन सक्ने थापाको विश्वास छ ।
‘रविन अहिले फिट छ, निको भईसकेको छ । आवश्यकता अनुसार टिममा आउँछ ।’ प्रशिक्षक थापा भन्छन् ।
उनले रविनको स्थान पुर्ती गर्न गत सिजन मनाङबाट खेलेका प्रवेश दनुवारलाई टिममा झिकाएका छन् । उनले पुलिसबाट उच्च प्रर्दशन गरिरहेका छन् ।
त्यसैले पनि प्रशिक्षक अनन्त उनलाई आवश्यकता अनुसार मैदान उतार्ने बताउँछन् ।
एन्फा एकेडेमीका उत्पादन रविनले ६३ सालको लिगबाट करियर सुरु गरेका थिए ।
जनकपुर जलेश्वरमा हुर्किएका रविनले पहिलो पटक संकटाबाट लिग खेलेका थिए । त्यसयता उनी पुलिस क्लबमा आबद्ध भए । ६६–६७ र ६८ सालमा पुलिसले लिगको उपाधि जित्दा रविन टिमको मुख्य खेलाडीको रुपमा थिए ।
६९ सालमा थ्री स्टारले लिग जित्दा रविलने पुलिसबाटै खेले । गत सिजन चोटको कारण उनी मैदान बाहिरनै रहे ।
लामो समय मैदान बाहिर रहेका रविन पुरानै फर्ममा देखिन चाहन्छन् । अनि राष्ट्रिय टिमको ढोका खोल्न चाहन्छन् । फेरि राष्ट्रिय टिममा आफुलाई स्थापित गर्न चाहन्छन् ।
‘सुरुवातमै राष्ट्रिय टिम भन्दा पनि क्लबमा राम्रो गर्ने हो । लिगमा राम्रो भएको खण्डमा राष्ट्रिय टिममा पक्कै स्थान बनाउनु पर्छ । जसको लागि मेहनत गर्छु ।’ रविन भन्छन् ।
यो पनि : मोफसलबाट चम्किएको 'हिरो'
फुटबलमा मिक्छेन 'प्रभाव'
ब्रिजेश, संघर्ष र पुनरागमन !
फेरिएका भुमिका, बदलिएको जिम्मेवारी
‘बुवाको सपना पुरा गर्नुछ’
