काठमाडौं । बुबा र आमासँगै कोरिया पुगेको थिए, मनिष डाँगी । कोरियन एकेडेमीमा बसेर अध्ययनसँगै फुटबल शिल्प निखारिरहेका उनी चैतको पहिलो साता नेपाल आएका थिए ।
नेपाल आउनु एउटै कारण थियो, नागरिकता बनाउने ।
कोरिया पुगेको करिब ७ बर्षपछि नेपाल फर्कदा मनिष नेपाली सहजै बोल्न सक्दैन थिए । घर परिवारबाट टाढा रहेका उनी कोरियाली साथीसँग एकेडेमीमै रहन्थे ।
नेपाल फर्कदा उनले नागरिकता बनाउने मात्रै सोचेका थिए । तर नेपाल आएपछि उनले नागरिकतामात्र बनाएनन्, घरेलु फुटबलमा नयाँ परिचय समेत थपे ।
त्यो समय नेपालमा सी डिभिजन लिग चलिरहेको थियो । उनी जेम्स एकेडेमीमा पढ्दा उनलाई फुटबल सिकाउने गुरु थिए, उर्जन श्रेष्ठ । ए डिभिजन लिगमा ब्रिगेड बाइज क्लबका प्रशिक्षक उनै उर्जनले मनिषलाई नेपाल आएको समय सी डिभिजन लिग खेलाउने निर्णय गरे ।
मनिषले अब सी डिभिजन खालीबारी युथ क्लबबाट खेल्ने भए । अन्तिम तीन खेलमात्रै खेलेका उनले खालीबारीलाई सी डिभिजन लिगको च्याम्पियननै बनाए । तीन खेल मात्र खेल्न पाएका मनिषले धेरैको मन जित्न सफल भए । अनि घरेलु फुटबललाई एकपटक आफुतर्फ आकर्षित गर्न सफल भए । उनले छोटो समयमा धेरै सिनियरहरुको धाप पाए, चर्चाको बिषय बने ।
आफ्नो अद्भुत खेल कौशलबाट उनले तीन खेलमा ५ गोल गर्न सफल रहे । लिगको अन्तिम दिन उनै म्यान अफ दी म्याच घोषित भए ।
सी खेल्दै गर्दा उनले नागरिकता पनि बनाए । भखरै १७ बर्ष लागेका मनिष लगत्तै कोरिया लागे । तर उनी एकाएक घरेलु फुटबलका ‘हटकेक’ बनिसकेका थिए ।
नेपालले अब साफ यू–१८ आयोजना गर्ने भयो । खेलाडीको छनोट सुरु भयो । मुख्य प्रशिक्षक चेतनारायण समेत मनिषलाई प्रारम्भिक टोलीमा सम्झिए ।
दोस्रो पटक कोरिया लागेको मनिष भदौ १६ गते नेपाल ओर्लिए । तर यसपटक उनी देशलाई प्रतिनिधित्व गर्ने लक्ष्यका साथ नेपाल फर्किएका छन् ।
साफ आगामी असोज ३ देखि १२ गतेसम्म नेपालमै आयोजना हुँदैछ ।
प्रतियोगितामा नेपाल सहित भारत, भुटान, माल्दिभ्स, बंगलादेश र श्रीलङ्काले खेल्नेछन् ।
मुख्य प्रशिक्षक श्रेष्ठले समेत सी डिभिजनमा राम्रो प्रभाव छाडेपछि मनिषलाई टिममा बोलाएका छन् ।
प्रारम्भिक टोलीमा नाम समावेश हुदाँ मनिषमा पनि छुट्टै उत्साह थपिएको थियो । कारण, देशबाट खेल्ने उनको सपना साकार हुदै थियो ।
भदौ १६ गते नेपाल झरेका उनले मुख्य प्रशिक्षक क्षेष्ठ सहित टिमलाई प्रभावित पारिसकेका छन् ।
सोही कारण प्रशिक्षक श्रेष्ठले उनलाई २५ सदस्यीय टिममा समावेश गरेका छन् । चाँडै अन्तिम २३ सदस्यीय खेलाडी छनोट गर्ने एन्फाको तयारी छ ।
प्रशिक्षक श्रेष्ठ समेत मनिष साफका लागि नेपालको मुख्य हतियार हुने आशा व्यक्त गर्छन् ।
पहिलो पटक देशको चन्द्र सुर्य अकिंत जर्सी लगाउने तयारीमा रहेका मनिष भने बुवाको सपना साकार हुन लागेकोमा दंग छन् ।
मनिषका बुवा बैदेशिक रोजगारीको शिलशिलामा कोरिया पुगेका थिए । कामको शिलशिलामा कोरियामै बुवाको निधन भयो । तर मनिषका बुवा छोरालाई राष्ट्रिय टिमबाट खेलाउन चाहन्थे । छोराको खेल हेर्न चाहन्थे ।
तर भाग्यविधाताले जिवनको एक पटकथाको अन्त्य गरिदिएको छ । तर राष्ट्रिय टिमबाट खेलेको हेर्न चाहने बुवाको सपना पुरा गरेको अर्को पटकथा लेखिन बाँकीनै छ । मनिष त्यही कथा लेख्न चाहन्छन् । बुवाको अधुरो सपना पुरा गर्न चाहन्छन् ।
‘बुबाको सपना थियो, छोरालाई राष्ट्रिय टिमबाट खेलाउने । अब प्रमाणित गर्ने अवसर आएको छ । नेपालबाट खेल्न मन छ । बुबाको सपना पुरा गर्न लाग्नेछु ।’ यू–१८ राष्ट्रिय टिमको तयारीमा रहेका उनले भने ।
प्रशिक्षक श्रेष्ठ पनि मनिषको आगमनसँगै नेपालको आक्रमण लाईन बलियो हुने बताउँछन् ।
‘केटो राम्रो छ । हामीलाई फरवार्ड लाईनमा सहयोग हुन्छ । तर उसले आक्रमक मिडफिल्डर देख्दै आईरहेको रहेछ । अब फरवार्डकालागि तयार पार्छु ।’ प्रशिक्षक श्रेष्ठ भन्छन् ।
मनिष भने प्रशिक्षकको निर्देशन अनुसार फरवार्ड र मिडफिल्ड दुवैमा खेल्न सक्ने मान्यता राख्छन् ।
‘कोरियामा म प्राय आक्रमक मिडफिल्डर भएर खेल्छु । तर त्यस पोजिसनको खेलाडीले फरवार्ड र मिडफिल्डबाट खेल्न सक्ने हुन्छन् । प्रशिक्षकको रणनीति अनुसार खेल्छु ।’ मनिषले खेलपाटीसंग भन्छन् । नेपाल साफ यू–१९ र साफ यू–१८ दुबै संस्करणको विजेता हो । त्यसैले विगतको विरासत जोगाउने चुनौती नेपालसामु छ ।
नेपालमा सन् २०१५ र भुटानमा २०१७ मा भएको साफमा नेपाल च्याम्पियन बनेको थियो ।
सी डिभिजन लिगबाट एकाएक चर्चामा आएर मनिषले आफुलाई प्रमाणित गर्न साफ च्याम्पियनसिप निकै महत्वपुर्ण रहेको मान्छन् । घरेलु् भुमिमा आफुलाई प्रमाणित गर्ने अवसर मनिषका अगाडी छ ।
याे पनि, एन्फा मैदानमा मनिषको 'काेरियन शैली'
-1734879364.jpg)
-1734875597.jpg)
