पदक विजेता भुपेन्द्र र मिुन स्वदेश फिर्ता

काठमाडौं । चीनको जिङयाङमा भएको एसियाली ग्रान्ड स्ल्याम बक्सिङ प्रतियोगितामा पदक विजेता नेपाली खेलाडी स्वदेश फर्किएका छन् ।

प्रतियोगितामा रजत विजेता भुपेन्द्र थापा र मिनु गुरुङ सोमबार स्वदेश फर्किएका हुन् । प्रतियोगितामा भुपेन्द्रले पुरुष ६४ केजी र मिनुले महिला ५४ केजीमा रजत जितेका थिए  । 

उनीहरुलाई नेपाल बक्सिङ संघले सोमबार भव्य स्वागत गरेको छ ।

संघका अध्यक्ष राम अवाले, राखेप सदस्य समेत रहेका बक्सिङ संघका उपाध्यक्ष अर्जुनबहादुर केसी, मुख्य प्रशिक्षक प्रकाश थापा मगर लगायतका पदाधिकारी, खेलाडी लगायतले सोमबार स्वागत गरे । रजत विजेता दुवै १३ औं सागका स्वर्णधारी हुन् ।

स्वागत कार्यक्रममा अध्यक्ष अवालेले यो अनुभावले एसियाली तथा ओलम्पिक खेलकुदमा राम्रो नतिजा ल्याउन मद्दत पुग्ने धारणा व्यक्त गरे ।

राखेपका सदस्य केसीले जुनसुकै प्रतियोगितामा पनि प्रतिद्वन्द्वीलाई कडा चुनौती दिन नेपाली खेलाडी सक्षम रहेको धारणा व्यक्त गरे ।

पदक विजेता दुवै खेलाडीले स्वर्ण नजिक पुगरे पनि असफल भएकोमा दुःख व्यक्त गर्दै आगामी दिनमा कमीकमजोरीलाई सुधार्दै स्वर्ण जित्न प्रयासरत रहने बताए ।