सरस्वतीले माल्दिभ्सको भलिबल लिग खेल्ने

काठमाडौं । राष्ट्रिय महिला भलिबल टिमकी महत्वपुर्ण सदस्य सरस्वती चौधरीले माल्दिभ्सको महिला भलिबल लिग खेल्ने भएकी छिन् ।

विभागीय टिम एपीएफबाट खेल्दै आएकी सरस्वती ब्यवसायीक रुपमा लिग खेल्न शनिबार साँझ माल्दिभ्स लागेकी छिन् ।

उनले माल्दिभ्सको लोरेन्जो क्लबबाट लिग खेल्नेछिन् ।

सरस्वतीका अनुसार उनी करिब एक हप्ता माल्दिभ्समा रहनेछिन् ।

यसअघि राष्ट्रिय भलिबल टिमकी नम्बर एक स्पाईकर प्रतिभा माली सोही लिग खेल्न माल्दिभ्स लागेको थिईन् । उनले पुलिस क्लबबाट प्रतियोगिता खेल्नेछिन् ।

'माल्दिभ्समा पहिलो पटक जान लागेकी हुँ ।' उड्नु अघि सरस्वतीले खेलपाटीसंग भनिन्, 'बाहिरको टिमबाट खेल्दा नयाँ अनुभव बटुल्न पाईन्छ । केही सिक्न पाईन्छ भन्ने लागेको छ ।'

'माल्दिभ्समा नयाँ टिमसंग खेल्दा अझ राम्रो अनुभव बटुल्न पाउँछु भन्ने लागेको छ ।' उनले भनिन् ।

सरस्वतीले पछिल्लो समय खुट्टामा चोट बोकेकी थिईन् ।

चोटबाट मुक्त हुँदै उनले नेपालमा आयोजित १३ औं दक्षिण एसियाली खेलकुद प्रतियोगिता (साग) खेलेकी थिईन् ।

उनकै प्रभावशाली प्रर्दशनमा नेपालले फाईनल सम्मको यात्रा तय गरेको थियो ।

अग्लो कदकी स्पाईकर सरस्वतीकै प्रेरणादायी प्रर्दशनमा विभागीय टिम एपीएफले घरेलु खेलकुदमा प्रभावशाली प्रर्दशन गर्दै आएको छ ।