काठमाडौं । पुर्व राष्ट्रिय एथ्लेटिक्स खेलाडी राजेन्द्र भण्डारीले १३ औं दक्षिण एसियाली खेलकुद प्रतियोगिता (साग)को दौरान एथ्लेटिक्सतर्फ गोपिचन्द्र पार्कीले जितेको स्वर्णले आफुलाई खुसी दिएको बताएका छन् ।
शुक्रबार एथ्लेटिक्सको १५ सय मिटर दौडमा भारतीय खेलाडी सुनिल दवारलाई पछाडी पार्दै गोपीले स्वर्ण जितेका थिए ।
करिब १४ बर्ष अगाडी साग खेलकुदको सोही स्पर्धा राजेन्द्रले स्वर्ण जितेका थिए ।
सन् २००६ मा ढाका सागमा राजेन्द्रले ५ हजार मिटर दौडमा स्वर्ण जितेका थिए । उनले निर्धारित दुरी १४ मिनेट १० दशमलव १९ सेकेन्डमा पुरा गरेका थिए । तर डेपिङ परिक्षणमा असफल भएपनि उनको स्वर्ण खोसिएको थियो ।
शुक्रबार स्वर्ण जितेपछि गोपीले राजेन्द्रको खोसिएको पदक आफुले फिर्ता ल्याउन सफल भएको प्रतिक्रिया दिएका थिए ।
गोपीले प्राप्त गरेको सफलताबारे राजेन्द्रले खेलपाटीसंग भने, ‘खोसिएको पदक फिर्ता ल्याए भन्दा खुसीनै छु । उसले भारतलाई पदक जित्न बञ्चित गराएको छ । सकारात्मक छु ।’
राजेन्द्रले विगतका सबै कीर्तिमान नेपाली खेलाडीले तोड्नुपर्ने बताउँदै नयाँ खेलाडीले एसियन प्रतियोगितामा पदक जित्नुपर्ने धारणा राखे ।
‘नेपाली खेलाडीले ५ हजार मिटरमा दौड जित्नु सुखद हो । राम्रो हो ।’ उनले भने, ‘उसको भनाई स्वभाविक र राम्रो हो ।’
राजेन्द्रले साग खेलकुदमा नेपाली खेलाडीले राम्रो प्रर्दशन गरेको बताउँदै घरेलु वतावरणले समेत सहयोग गरेको बताए ।
‘अब खेलाडीको लक्ष्य एसियन गेम्स हुनुपर्छ । राष्ट्रिय रेकर्ड सुधार गर्यौ भन्दा समेत एसियन स्तरमा पदक जित्ने लक्ष्य राख्नुपर्छ ।’ उनले थपे ।
