काठमाण्डौं । बहुप्रतिक्षित प्रतियोगिता फिफा विश्वकप फुटबल रुसमा आजबाट सुरु हुँदैछ । प्रत्येक चार बर्षपछि आयोजना हुने विश्वकप खेलप्रेमीको लागि निकै प्रतिक्षाको विषय बन्छ ।
रुसमा हुने २१ औं संस्करणको विश्वकपको उद्घाटन हुन् केहि घण्टा बाँकी रहदा विश्वभरका खेलप्रेमीहरु पहिलो खेलको प्रतिक्षामा छन् । विश्वकपको प्रतिक्षामा बस्नेमा नेपालका खेलाडीहरु पनि पर्छन् ।
विश्वकपको प्रतिक्षामा फुटबल खेलाडी मात्र छैनन् । अन्य खेलका खेलाडी पनि विश्वकपको उत्तिकै प्रतिक्षामा छन् । खेलपाटी डटकमका लागि रुस विश्वकपबारे तीन खेलका ३ राष्ट्रिय खेलाडीले आफ्नो धारणा राखेका छन् ।
भलिबलका मान बहादुर श्रेष्ठ, करातेका पर्शुराम बास्तोला र टेबलटेनिसकी रविना महर्जन रुस विश्वकपबारे के भन्छन् ? उनीहरुकै शब्दमा ....
मान बहादुर श्रेष्ठ (भलिबल)
![](/uploads/shares/maan.jpg)
विश्वकपमा मेरो समर्थन जर्मनीलाई हुनेछ । जर्मन टिमको कम्बिनेसन धेरै राम्रो छ । ११ खेलाडी उस्तै छन् । जर्मन टोलीका सबै खेलाडीले मेहेनत गर्छन् जस्तो मलाई लाग्छ । डिफेन्स देखि फरवार्डको मेहेनत राम्रो छ ।
मैले सन् २०१० बाट विश्वकप हेर्न सुरु गरेको हो । चार बर्षपछि आउने भएर होला विश्वकपको लागि निकै उत्साहित छु । विश्वकपको प्रतिक्षामा छु । समय मिलेमा सबै खेल हेर्छु । तर, एसियन गेम्सको क्लोज क्याम्पमा रहेको कारण समय मिल्दैन कि भन्ने लागेको छ । बिहान र बेलुकाको ट्रेनिङपछि समय मिलाएर विश्वकप हेर्छु ।
यो पटकको विश्वकपमा पोर्चुगलको क्रिस्टियानो रोनाल्डो चम्कने मेरो अनुमान छ । युवामा ब्राजिलको नेयमार पनि चक्कने छन् । अर्जेन्टिनाका लियोनल मेस्सीको प्रदर्शन अन्य समय जस्तै सदाबहार हुन्छ भन्ने लागेको छ । उनी निकै स्किलफुल छन् ।
जर्मनी बाहेकको अर्को कुनै टिमले विश्वकप जित्छ भने त्यो स्पेनले जित्नेछ । मलाई लाग्छ, स्पेनको पनि टिम गेम एकदमै राम्रो छ । खेलाडीहरु पनि राम्रा छन् । स्पेन विश्वकप जितिसकेको टोली पनि हो । स्पेनको टोलीमा जित्ने भावना धेरै हुन्छ ।
रबिना महर्जन (टेबलटेनिस)
![](/uploads/shares/rabina mha.jpg)
यो विश्वकपमा स्पेनलाई समर्थन गर्छु । स्पेनमा टप प्लेयरहरु छन् । स्पेनिस टोलीमा टिम वर्क निकै राम्रो छ । आफ्नो लिगमा सबैले उत्कृष्ट प्रदर्शन गरेका छन् । स्पेनिस टिमको मनपर्ने खेलाडी गोलकिपर डेभिड डी गिया हो ।
जर्मनी सधै उपाधि दाबेदार टिम हो । जर्मनीको टोलीमा बुन्डेस लिगा र वायर्न म्युनिखबाट खेल्ने खेलाडीहरु बढी रहेको कारण टिम वर्क राम्रो छ । टिमको कम्बिनेसन मिलेको हुन्छ । जर्मनी यस्तो टिम हो जो प्राय सेमिफाइनल पुगिरहेको हुन्छ ।
यो पटकको विश्वकपमा चम्कने सक्ने खेलाडीमा स्पेनको इस्को र ब्राजिलको ग्राबियल जिसस हो । पोर्चुगलका क्रिस्टियानो रोनाल्डो, अर्जेन्टिनाका लियोनल मेस्सी क्लब फुटबलमा सधै राम्रो गर्ने खेलाडी हो ।
तर, विश्वकपमा चै राम्रो प्रदर्शन गर्न सकेका छैनन । समर्थकहरु उनीहरुबाट उत्तिकै राम्रो प्रदर्शनको आशा गर्छन । यो पटक उत्कृष्ट प्रदर्शन गरेर आफ्नो टिमलाई विश्वकपको उपाधि दिलाउन महत्वपूर्ण भूमिका निभाउने छन् भन्ने लागेको छ ।
मैले सन् २००२ बाट विश्वकप हेर्न सुरु गरेको हो । र, यो विश्वकपको दिन गनेर बसेको छु । चार बर्षमा एक पटक आउने हुनाले एक्साईटेड छु । विश्वकप सबै खेलाडीहरुको लागि मौका हो, आफ्नो राष्ट्रको लागि खेल्ने । आफ्नो राष्ट्रलाई खेलको माध्यमबाट चिनाउने अर्को माध्यम पनि हो ।
यो विश्वकपको सबै खेल त् हेर्दिन तर स्पेनको सबै खेल हेर्छु । स्पेन बाहेक अन्य राम्रो टिमको खेल हेर्छु ।
पर्शुराम बास्तोला (कराते )
![](/uploads/shares/parshu raam.jpg)
यो विश्वकपमा म ब्राजिललाई सपोर्ट गर्छु । किनकी विश्वकपमा ब्राजिलको इतिहास छुट्टै छ । ब्राजिलले पाँच पटक उपाधि जितेको छ । ब्राजिलले समूह चरणको २० खेलमा ११ पटक सेमिफाइनल र ७ पटक फाइनल खेलिसकेको छ ।
टिमको सबैभन्दा मन पर्ने खेलाडी नेयमार हो । अहिलेका स्टार नेयमार फिफा कन्फीडेरेसन कप विजेता र ओलम्पिकमा स्वर्ण विजेता खेलाडी हुन् । नेयमारले यो पटक दोस्रो विश्वकप खेल्दै छन् । पेरिस सेन्ट जर्मेन (पिएसजी) स्टार नेयमारले बार्सिलोनाबाट फिफा क्लब विश्वकप पनि जितिसकेका छन् ।
यो पटकको विश्वकप जर्मनीले जित्ने सम्भावना छ । जर्मनी अघिल्लो पटकको विजेता समेत हो । यो पटकको विश्वकपमा ब्राजिलका नेयमार र अर्जेन्टिनाका मेस्सी चम्कन्छन जस्तो लाग्छ । मेस्सीको खेल सधै उस्तै हुन्छ, निकै सुन्दर ।
सन् २०१० बाट मैले विश्वकप हेर्न सुर गरेको हो । र, रुस विश्वकप नजिकिदै गर्दा निकै उत्साहित छु । तर, १८ औं एसियन गेम्सको क्लोज क्याम्पमा रहेको कारण सबै खेल हेर्न नमिल्ने हो कि भन्ने लागेको छ ।