एजेन्सी । इंग्ल्याण्डमा सम्पन्न १२ औं संस्करणको आईसीसी एकदिवसीय विश्वकप क्रिकेटको उपाधि घरेलु टोलीले कब्जा जमाएको छ ।
आइतबार राति भएको फाइनलमा न्युजिल्याण्डलाई सुपर ओभरमा पराजित गर्दै इंग्ल्याण्डले पहिलो पटक उपाधि जितेको थियो । तर, उक्त फाइनलमा अम्पायरले गलत निर्णय गरेको भन्दै यतिबेला आईसीसीको चर्को आलोचना भएको छ ।
लण्डनस्थित लर्ड्स क्रिकेट मैदानमा न्युजिल्याण्डले दिएको २४२ रनको लक्ष्यसहित जवाफी ब्याटिङ गरेको इंग्ल्याण्डले ५० ओभरमा अलआउट हुँदै २४१ रन बनाएपछि खेल सुपर ओभरमा गएको थियो ।
सुपर ओभरमा पनि खेलले नाटकीय रुप लियो । इंग्ल्याण्डले १५ रन जोड्दै न्युजिल्याण्डलाई १६ रनको लक्ष्य दिएको थियो । जवाफमा न्युजिल्याण्डले १५ रन नै बनायो । तर, सुपर ओभरमा समान स्कोर भएपनि बढी बाउन्ड्री प्रहार गरेको कारण इंग्ल्याण्डले उपाधि जितेको थियो ।
तर, उक्त खेलमा टर्निङ पोइन्ट थियो खेलको अन्तिम ओभरको चौथो बल । अन्तिम ओभरमा इंग्ल्याण्डलाई जितका लागि १५ रन आवश्यक थियो । पहिलो २ बल डट गरेका ट्रेन्ट बोल्टलाई तेस्रो बलमा बेन स्ट्रोक्सले छक्का प्रहार गरेका थिए ।
चौथो बलमा स्ट्रोक्सले २ रनका लागि दौडिए, भाग्य बस गुप्टिलले रन आउटका लागि फालेको बल स्ट्रोक्सले डाइभ गर्दा ब्याटमा लागेर बल बाउन्ड्री पुगेको थियो ।
स्ट्रोक्सको अन्जानमा बल बाउन्ड्री पुगेको भन्दै अम्पायरले इंग्ल्याण्डलाई चार रन अतिरिक्त दिइएको थियो । जसको कारण इंग्ल्याण्ड खेलमा फर्किएको थियो ।
अहिले त्यहिँ अम्पायरको निर्णयमा ठूलो बहस चलेको छ । तर आईसीसीले भने यसबारे आधिकारिक रुपमा केहि बताएको छैन ।
आईसीसीका पूर्व अम्पायर तथा क्रिकेट बिधान बनाउने कमिटिका एक सदस्य सिमोन टौफेलले भने उक्त ६ रनको निर्णय गलत भएको बताएका छन् ।
'यो अम्पायरको गल्ति हो । इंग्ल्याण्डलाई ५ रन मात्र दिनु पर्ने थियो,' सिमोनले भने, 'उनीहरुले (अम्पाएर) ब्याट्सम्यानले पिच क्रस गरिसकेको सोचे तर खेलाडी क्रस हुन बाँकी रहेको रिप्लेमा प्रस्ट देखिन्छ ।'
क्रिकेटको नियम अनुसार त्यो निर्णय गलत देखिएको छ । विधानको धारा १९ दशमलब ८ अनुसार यदि ओभर थ्रोको कारण बलले बाउन्ड्री छोयो भने बिपक्षि टिमलाई पेनाल्टी स्वरुप रन प्रदान गरिन्छ । र, ब्याट्सम्यानले दौड पुरा गरेको रन समेत ब्याट्सम्यानको खातामा हुनेछ ।
यदि फिल्डरले बल फाल्नु अघि दुई ब्याट्सम्यानले क्रिज साटासाट नगरेको खण्डमा रन प्राप्त गर्दैनन् । तर, फाइनलमा स्ट्रोक्स र आदील राशिदले क्रिज साटासाट गरेका थिएनन् । र, नियम अनुसार स्ट्रोक्स स्ट्राइकमा समेत हुने थिएनन् ।
