भिनिसियसलाई एक युरो पनि बढी तिर्न तयार छैन रियल!

काठमाडौं। रियल मड्रिड र ब्राजिलियन स्टार भिनिसियस जुनियरबीच नयाँ सम्झौताबारे भइरहेको वार्ता निर्णायक चरणमा पुगेको छ।

ईएसपीएनको रिपोर्टअनुसार स्पेनिस क्लबले यसै साता भिनिसियसका प्रतिनिधिहरूसँग अन्तिम चरणको छलफल गर्ने तयारी गरेको छ। तर‚ पारिश्रमिकका विषयमा रियल आफ्नो अडानबाट पछि हट्ने पक्षमा छैन। क्लबले यसअघि दिएको प्रस्तावभन्दा एक युरो पनि बढी दिन नसकिने स्पष्ट संकेत दिएको छ।

क्लब विश्वकपपछि रियलले भिनिसियसलाई नयाँ सम्झौताको प्रस्ताव दिएको थियो। उक्त प्रस्तावअनुसार २६ वर्षीय विंगरले प्रतिसिजन करिब २२ मिलियन युरो पारिश्रमिक पाउनेछन्। क्लबका आन्तरिक स्रोतका अनुसार यही रकम नै रियलको अन्तिम प्रस्ताव हो।

यता भिनिसियस र उनका प्रतिनिधिहरू भने वार्षिक करिब ३० मिलियन युरो पारिश्रमिकको मागमा छन्। यसका कारण दुवै पक्षबीच अझै पनि करिब ८ मिलियन युरोको अन्तर कायम छ। हाल भिनिसियसले वार्षिक करिब १७ मिलियन युरो पारिश्रमिक लिइरहेका छन्।

उनको वर्तमान सम्झौता सन् २०२७ को जुनसम्म कायम छ। यदि नयाँ सम्झौतामा सहमति नभए आगामी जनवरीदेखि उनले विदेशी क्लबहरूसँग प्रि-कन्ट्र्याक्ट सम्झौताबारे औपचारिक रूपमा छलफल गर्न पाउनेछन्।

ईएसपीएनका अनुसार यस साताको वार्तामा रियलका प्रमुख स्काउट जुनी कालाफाटले क्लबको तर्फबाट नेतृत्व गर्नेछन्। सन् २०१८ मा फ्लामेङ्गोबाट भिनिसियसलाई रियलमा भित्र्याउन कालाफाटले महत्त्वपूर्ण भूमिका खेलेका थिए। अहिले पनि उनलाई लामो समयसम्म क्लबमै राख्ने प्रयासको जिम्मेवारी उनकै काँधमा छ।

पारिश्रमिकको विषयमा मतभेद रहे पनि दुवै पक्षबीच संवाद भने निरन्तर जारी छ। भिनिसियसका प्रतिनिधिहरूका अनुसार यो उनको करिअरकै सबैभन्दा महत्त्वपूर्ण सम्झौता हुनेछ।

रियलमा आबद्ध भएपछि उनले यूईएफए च्याम्पियन्स लिगका दुईवटा फाइनलमा गोल गर्दै टोलीका मुख्य खेलाडीका रूपमा आफूलाई स्थापित गरेका छन्। त्यसैले नयाँ सम्झौतामा आफ्नो योगदानअनुसारको सम्मान र पारिश्रमिक पाउनुपर्ने उनीहरूको धारणा छ।

यदि सम्झौता हुन नसके परिस्थिति फरक मोडमा जान सक्छ। नयाँ सम्झौता पूर्ण रूपमा असफल भए रियलले यही समरमा भिनिसियसलाई बेच्ने विकल्पसमेत विचार गर्न सक्ने बताइएको छ। त्यस अवस्थामा क्लबले उनको ट्रान्सफर शुल्क करिब १५० मिलियन युरो निर्धारण गर्न सक्नेछ। यद्यपि‚ त्यसबेला उनको सम्झौतामा एक वर्ष मात्र बाँकी रहनेछ।

यसैबीच, पूरा समरभरि भिनिसियसप्रति सबैभन्दा बढी चासो देखाउने क्लब इङ्लिस प्रिमियर लिग च्याम्पियन आर्सनल रहेको बताइएको छ। हालसम्म कुनै औपचारिक प्रस्ताव सार्वजनिक नभए पनि विभिन्न रिपोर्टका अनुसार खेलाडीका प्रतिनिधिहरूसँग अनौपचारिक छलफल भइसकेको छ। त्यसैले एमिरेट्स स्टेडियममा भिनिसियसको सम्भावित आगमनबारे चर्चा पनि तीव्र बन्दै गएको छ।