काठमाडौं । बंगलादेशमा सम्पन्न फिबा यू-१८ एसियन च्याम्पियनसिपको साबा क्वालिफायरमा नेपालले दोस्रो स्थान हासिल गरेको छ । बिहिबार भएको अन्तिम खेलमा आयोजक बंगलादेशलाई पराजित गर्दै नेपालले दोस्रो स्थान हासिल गरेको हो ।
ढाकामा भएको अन्तिम खेलमा नेपालले आयोजक बंगलादेशलाई ७६ – ५१ अंकले पराजित गरेको हो । यो जितसंगै नेपालले प्रतियोगितामा दुई जितसहित उपविजेता बनेको छ । प्रतियोगिताको उपाधि भने भारतले जितेको छ । उपाधिसंगै भारत एसियन च्याम्पियनसिपमा छनोट भएको छ ।
यसअघि नेपालले बिहिबार बिहान भएको खेलमा माल्दिभ्सलाई ७२-३३ अंकले हराएको थियो । नेपाल पहिलो खेलमा भारत र दोस्रो खेलमा श्रीलंकासंग भने पराजित भएको थियो ।
पाँच राष्ट्र सहभागी प्रतियोगितामा नेपाल सहित आयोजक बंगलादेश, श्रीलंका, भारत र माल्दिभ्सले सहभागिता जनाएका छन् ।
