काठमाडौं । नेपाल खेलकुद पत्रकार मञ्च (एनएसजेएफ) ले आयोजना गर्ने बजाज पल्सर स्पोर्टस् अवार्डसंग अन्तर्राष्ट्रिय ब्राण्ड केल्मी नेपाल जोडिएको छ ।
आगामी असार तेस्रो साता आयोजना हुने अवार्डका लागि केल्मी नेपाल सहप्रायोजकको रुपमा जोडिएको हो ।
मञ्च र केल्मीको नेपालमा आधिकारिक बिक्री वितरक कामारु ट्रेडिङ प्रालिबीच बिहिबार सम्झौतामा हस्ताक्षर भएको छ । मञ्च र केल्मीले तीन बर्षको लागि सम्झौता गरेको हो ।
मञ्चका अध्यक्ष दुर्गानाथ सुवेदी (देवेन्द्र) र कामारु ट्रेडिङका म्यनेजिङ डिरेक्टर उत्तम न्यौपानेबीच सम्झौता पत्रमा हस्ताक्षर भएको छ ।
सम्झौतासंगै अवार्डको आधिकारिक पोसाकका रुपमा केल्मी रहनेछ । अब केल्मी नेपालले मञ्चलाई आवश्यक पोसाक उपलब्ध गराउने छ । केल्मीले अवार्डका लागि २०० टिसर्ट र विभिन्न विधामा मनोनित खेलाडीका लागि ३० थान ट्रयाक सुट उपलब्ध गराउनेछन् ।
यस्तै मञ्चले टेलिभिजन लाइभ पार्टनरको रुपमा एभिन्युज टेलिभिजनसँग सम्झौता नवीकरण गरेको छ । मञ्चका अध्यक्ष सुवेदी र एभिन्युज टिभीका सिईओ समृद्धि राज कर्णिकारबीच सम्झौता पत्रमा हस्ताक्षर भएको छ ।
सम्झौतासंगै अवार्ड कार्यक्रम एभिन्युज टेलिभिजनबाट प्रत्यक्ष प्रसारण हुनेछ ।
काठमाडौं कमलादीस्थित प्रज्ञा भवनमा आयोजना हुने स्पोर्ट्स अवार्ड असार १७ गते आयोजना हुनेछ । मञ्चले यसपटक विभिन्न १० विधामा अवार्ड प्रदान गर्नेछ ।
यस पटक पिपल्स च्वाइस अवार्डसंगै वर्ष उत्कृष्ट खेलाडी पुरुष, वर्ष उत्कृष्ट खेलाडी महिला, युवा वर्ष खेलाडी, वर्ष प्रशिक्षक, पारा एथलिट, स्पेसल अवार्ड, लाइफटाइम एचिभमेन्ट अवार्ड र टिम अफ द इयर गरी ९ विधामा अवार्ड प्रदान गरिने मञ्चले जनाएको छ ।
यस्तै यस वर्ष एक नयाँ विधा थप गरिएको छ । थप गरिएको विधामा इन्टरनेसनल एसियन स्पोर्ट्स जर्नालिस्ट अवार्ड रहेको छ ।
वर्ष खेलाडी पुरुष र महिला, पिपल्स च्वाइस र प्रशिक्षक गरी चार विधाका विजेताले बजाज पल्सर मोटरसाइकल प्राप्त गर्नेछन् । अन्य विधाका विजेतालाई जनही ५० हजार रुपैयाँसहित विभिन्न गिफ्ट ह्याम्पर प्रदान गर्ने आयोजकले जनाएको छ ।
मञ्चले पिपुल्स च्वाइस अवार्ड विधाका लागि ५ खेलाडी मनोनित गरिसकेको छ । यस अवार्डका लागि मनोनित हुनेमा क्रिकेटका सन्दीप लामिछाने, भलिबलकी रेश्मा भण्डारी, ब्याटमिन्टनका प्रिन्स दाहाल, फुटबलकी सावित्रा भण्डारी र शारीरीक सुगठनका महेश्वर महर्जन रहेका छन् ।
